A galega Tegnix participará na iniciativa europea WikiSkills destinada a espallar as vantaxes de traballarmos en clave wiki

Unha das xuntanzas deste proxecto de alcance europeo baseado na filosofía da Rede cooperativa e o software libre

Tegnix, empresa galega centrada na achega de solucións empresariais e formativas baseadas en software libre, infórmanos de que vén de recibir o convite do Centro de Supercomputación de Galicia (CESGA) para participar directamente na construción do proxecto WikiSkills, unha iniciativa de alcance europeo que se dirixe a aglutinar un grupo de expertos nas vantaxes colaborativas da Rede e na apertura do coñecemento. Ou sexa, a base fundamental do software libre e tódolos movementos parellos que se dan ao abeiro das redes de fóra delas. Cuestións como a formación continua, as ferramentas wiki, as redes sociais ou, sinala Tegnix, iniciativas emprendedoras baseadas directamente na colaboración, como a Aula Tegnix.
Segundo nos conta persoalmente Roberto Brenlla, coordinador deste espazo de formación da empresa galega, WikiSkills sinala ten como obxectivo potenciar e fomentar o uso de wikis e desenvolver cursos de formación para consolidar as habilidades wiki na sociedade actual. Ou sexa, que o que se busca é tirar o máximo partido deste espírito de traballo e coñecemento aberto e dispoñible, facilitando o seu pulo e correcto desenvolvemento cunha serie de normas para gobernar os comportamentos dos usuarios e co fin de garantir unha interacción respectuosa. Segundo informan os responsables de WikiSkills, este proxecto lánzase a investigar o impacto das wiki na sociedade actual, “porque implican comportamentos sociais moi importantes, tales como cooperación, respecto, traballo en equipo, desenvolvemento de contidos e xestión comunitaria”. Tirando dese fío, chegamos a conceptos como comportamento cívico, inclusión social, emprego, entendemento cultural e habilidades para aprender de xeito autónomo.
WikiSkills acadaría estes obxectivos fornecendo cursos de formación en ferramentas wiki e habilidades aos grupos obxectivo. “Estes cursos proporcionarán un entendemento básico das novas tecnoloxías da información e o uso participativo de Internet”, infórmase.
O grupo WikiSkills está conformado por expertos de toda Europa con longa experiencia en software libre ou aprendiza a distancia, como por exemplo o Centro de Supercomputación de Galicia (CESGA), Wikimedia Suecia, a Fundación Internet.org (entidade coordinadora) ou Die Berater, entre outros centros e entidades da contorna europea.