A Tecnópole de Ourense acolle en outubro unha nova xeira de Betabeers
luns, 6 de agosto do 2012
Os encontros Betabeers, xuntanzas tecnolóxicas
informais e distendidas que se están a desenvolver en diferentes puntos da nosa
xeografía, chegan o día 26 do
mes de outubro á Tecnópole de Ourense, logo de ter pasado pola Coruña,
Santiago e Vigo, facendo gala dun novo xeito (máis 2.0) de reflexionar arredor
de servizos web ou aplicacións móbiles de última xeración. Máis polo miúdo e
segundo nos recordan dende a Tecnópole (Parque Tecnolóxico de Galicia), Betabeers
ten por obxectivo relacionar a persoas do sector a través do coworking e amosar as últimas
tecnoloxías ou innovacións en desenvolvemento a través de obradoiros de breve
duración.
Estas actividades xuntan baixo un mesmo teito a profesionais que
están a desenvolver o seu labor en proxectos innovadores galegos de gran
potencial de medre, colaboración e espallamento. Búscase cubrir catro áreas
principais de interese: encontro de desenvolvedores web e apps, charlas de
desenvolvemento, presentacións de startups
e networking. As reunións son de
balde, en horario de tarde e dando acubillo a arredor de 35 persoas. “Nelas lévase a cabo a presentación de
proxectos para demostrar que non só en Silicon Valley se poden xerar negocios
interesantes”, infórmase.