A Fundación OpenStack velará por garantir unha nube en código aberto

A computación na nube é algo relativamente novo e, polo tanto, aínda estamos a tempo para garantir no seu seo a máxima interoperabilidade e compatibilidade entre formatos, linguaxes, códigos e feituras diversas. Ou sexa, que é posible non cometer erros pasados con respecto a desenvolvementos tecnolóxicos que agora, en virtude de propostas empresariais excluíntes, achegan máis atrancos de accesibilidade ca vantaxes. Co fin de garantir o espírito do código aberto na nube e fornecer de recursos compartidos a desenvolvedores e usuarios púxose en marcha os días pasados a Fundación OpenStack, fogar independente do selo do mesmo nome e a día de hoxe dando acubillo a máis de 5.600 residentes individuais.
Asemade, ten asegurados máis de 10 millóns de dólares en fondos e está capacitada, segundo sinalan os seus responsables, de servir “a desenvolvedores e usuarios achegando ferramentas compartidas que reforzan a influencia das clouds OpenStack públicas e privadas, capacitando aos provedores que acudan á plataforma e axudando aos deseñadores a producir o mellor software da nube do mercado”. Tanto o propio software que abrolla do seu seo como o feito facérmonos membros da fundación é de balde para todo o mundo. “Agárdase que os membros da comunidade participen a través de contribucións técnicas e esforzos para construíla”, sinálase. Engadir que a plataforma OpenStack foi fundada en xullo de 2010 por Rackspace e a NASA co apoio de 25 multinacionais e ducias de desenvolvedores de primeira liña. Arestora dá acubillo a 180 compañías participantes e 550 desenvolvedores contribuíntes. Xuntos, teñen acadado seis lanzamentos de software en dous anos. A creación da fundación responde a un interese por afianzar esta liña de traballo, mantela viva e crear un ecosistema sostible para o éxito a longo prazo. Arestora a entidade ten oito membros platino (AT&T, Canonical, HP, IBM, Nebula, Rackspace, Red Hat e SUSE), e trece membros de ouro (Cisco, Cloudscaling, Dell, DreamHost, ITRI, Mirantis, Morphlabs, NetApp, Piston Cloud Computing, Yahoo!, Intel, NEC e Vmware). Asemade, xa apoian á fundación empresas como Brocade, eNovance, Gale Technologies, GridCentric, Huawei, Internap, Metacloud, PayPal, RiverMeadow Software, Smartscale Systems, Transcend Computing e Xemeti.
Segundo informan estas corporacións, a OpenStack Foundation representa “unha nova era de establecer estándares de código aberto para a informática na nube, baseada na colaboración de múltiples provedores”.
OpenStack, como lembraremos, é software open source para construír clouds. Creado para impulsar os estándares do sector, rematar co peche da nube e adoptar un contorno mundial rápido, OpenStack é unha plataforma común e aberta tanto para nubes públicas como privadas. Recordar ademais que o sistema operativo cloud open source permite aos negocios xestionar a informática, o almacenamento e os recursos da Rede a través dun portal de autoservizo e aplicacións en hardware estándar a gran escala.