Vodafone continúa a liderar o mercado 3G en España
martes, 4 de setembro do 2007
O conselleiro delegado de Vodafone en España,
Francisco Román, anunciou durante un encontro coa prensa en Santander que “1 de cada 4 dos nosos clientes xa ten un
terminal UMTS”, de xeito que con 3,6 millóns de clientes de telefonía 3G a
operadora británica supera sobradamente os 2 millóns de clientes deste tipo que
ten Telefónica, o que sitúa á compañía na posición
líder do sector da telefonía móbil de terceira xeración.
Curiosamente Vodafone conta con 15 millóns de clientes mentres Telefónica a
supera con 22 millóns, polo que iso indicaría que os usuarios de Vodafone están
máis predispostos á adquisición de terminais válidos para o acceso á Rede e ós
seus servizos.
Dende Vodafone estiman que nos vindeiros anos poderían dobrar ou triplicar o número
de usuarios de 3G, o que non lle impide asegurar que están a traballar na súa
entrada no mercado do acceso á Rede mediante ADSL (para o que se rumorea que
están en acordos con Tele2).
