Vodafone chega a un acordo preliminar para a compra de Ono
venres, 7 de marzo do 2014
Reuters publicou hoxe que Vodafone
mellorou a súa oferta polo grupo Ono, conseguindo así chegar a un principio
de acordo co grupo de accionistas que controlan a principal operadora de cable
en España. A xuntanza dos accionistas de Ono co conselleiro delegado de
Vodafone teríanse desenvolvido onte, esperando que durante a fin de semana
Vodafone inicie “un proceso de due diligence
de Ono a fin de ultimar unha oferta vinculante”, segundo unha das fontes
consultadas pola axencia de comunicación.
O mes pasado Vodafone ofrecera 7.000 millóns de euros por Ono, cantidade
considerada como insuficiente polos accionistas, e que só podería mellorarse
ata o vindeiro 13 de marzo, cando está convocada unha reunión dos accionistas
de Ono para validar a saída a bolsa da compañía (o que bloquearía a compra por
parte de Vodafone).
A compra de Ono por parte de Vodafone tería un claro valor estratéxico, por
permitir incrementar a súa cota no mercado da banda larga do 7,5 ao 21%, á vez
que suporía a incorporación de 1,1 millóns de clientes móbiles de Ono,
mellorando tamén a súa posición no sector do 24,8 ao 26%.