Ubisoft anuncia novos xogos de Assassin’s Creed

Ubisoft aposta pola franquía de Assassin’s Creed con máis forza que nunca, con toda unha serie de xogos que están a desenvolverse, e dos que o principal expoñente sería Assassin’s Creed Mirage, unha entrega principal da saga que estará ambientada no século IX en Bagdag e protagonizada por Basim Ibn Is’haq, o Oculto que puidemos ver en Assassin’s Creed Valhalla (aínda que menos maduro, xa que a nova historia está ambientada 20 anos antes).
Este xogo promete ser máis breve e narrativo que as últimas entregas da serie (na liña das primeiras entregas, que podían completarse en 10-15 horas), e permitirannos vivir a evolución de Basim, quen irán mellorando as súas habilidades e comprender o novo credo que dá lugar aos Ocultos, orde dos primeiros Assassins que medrarán até converterse en Mestres Assassins.
En Mirage veremos como Basim terá que tirar proveito da súa habilidade para trepar nun contorno urbano a grande escala, saltando por tellados, escalando torres e facendo parkour para evitar aos gardas polos catro distritos de Bagdad, o que claramente lembra ás primeiras entregas da saga, aínda que tamén teremos elementos modernos como a aguia Enkidu, que inspeccionará as zonas dende o ceo e marcará aos inimigos para a súa eliminación sixilosa.
Assassin’s Creed Mirage verá a luz en 2023 en Xbox Series X|S, Xbox One, PS5, PS4, PC e Amazon Luna.
Pero non é o único xogo de Assassin’s Creed que está en desenvolvemento, xa que dende Ubisoft Quebec están a traballar en Assassin’s Creed Codename RED, un xogo de rol de mundo aberto ambientado no Xapón feudal; Ubisoft Montreal traballa en Assassin’s Creed Codename HEXE; ambos desenvolvementos forman parte de Assassin’s Creed Codename INFINITY, unha plataforma que conectará aos xogadores a través de distintas experiencias, e traerá un novo modo multixogador cunha experiencia independente. A maiores tamén teremos Assassin’s Creed Codename JADE, que será un grande título de rol, acción e aventura ambientado na antiga China que destaca por funcionar en dispositivos móbiles.
Ubisoft tamén adiantou que están a desenvolver unha serie de acción de Assassin’s Creed con Netflix, así como un videoxogo que será exclusivo para subscritores da plataforma de streaming.