Telecon e o COETG imparten unha xornada sobre o potencial das TIC no vieiro do aforro enerxético
venres, 12 de abril do 2013
- Jacobo Penide, director de Desenvolvemento de Negocio de Telecon
A firma galega Telecon
e o Colexio Oficial de Enxeñeiros de Telecomunicación de Galicia
(COETG) veñen de acadar un acordo
para desenvolver unha xornada formativa de carácter técnico sobre o
papel que poden xogar as Tecnoloxías da Información e as
Comunicacións (TIC) na mellora da eficiencia enerxética en
empresas, entidades públicas e edificios. Nesta xornada participará
como relator Jacobo Penide, enxeñeiro de telecomunicación pola
Universidade de Vigo, Executive MBA pola Escola de Negocios Caixanova
e director de Desenvolvemento de Negocio de Telecon. Desenvolverase o
día 18 de abril a partir das 16:30 horas no Hotel Porta do Camiño
de Santiago de Compostela.
Telecon, recentemente de
actualidade en Código Cero pola
súa adhesión a unha nova alianza-plataforma empresarial dirixida á
procura de novos mercados, é unha empresa tecnolóxica galega
especializada no deseño, desenvolvemento, fabricación e
comercialización de redes intelixentes de seguimento e control
aplicadas á seguridade, a eficiencia enerxética e a telemedida. “A
nosa compañía”, informa Jacobo Penide “está
a ter un gran éxito na implantación da súa plataforma tecnolóxica
Ecohub, que ofrece a empresas e entidades de calquera sector unha
auténtica solución intelixente e personalizada para optimizar a
xestión enerxética e reducir custos”. Ecohub,
como
dixemos recentemente con motivo da súa presentación, é un
sistema de xestión intelixente que, en termos concretos que nos
axuden a entender o seu radio de alcance, permitiríanos rebaixar a
nosa factura da luz até nun 20%. Ecohub, que tamén é marca
distintiva de mercado, é aplicábel igualmente a outros subministros
para o fogar ou a empresa, como a auga ou o gas. Basicamente, o que
fai é identificar e corrixir ineficacias; recibir alertas de
incidencias e documentar o gasto real para comparalo coa factura que
envía a compañía que achega servizo. Estas son algunhas das
vantaxes que o sistema Ecohub ofrece a empresas, organismos públicos
e edificios. E todo isto, sinala Telecon, en beneficio de algo que
nos interesa a todos, e máis nestes tempos de menores orzamentos, de
estreiteces económicas e, cómpre non esquecelo, de fraxilidade
medioambiental (o factor ecolóxico, que cada vez nos preocupa máis,
e está ben que así sexa). Falamos do aforro enerxético.
Segundo
informa Telecon, só cunha primeira corrección de problemas e unha
optimización do funcionamento dos equipamentos, é perfectamente
posíbel chegarmos ao 20% de redución na factura.