Reclámanlle á Xunta o seu apoio para desenvolver o fogar dixital en Galicia
mércores, 14 de xullo do 2010
Os
presidentes da Asociación Galega de Empresas TIC (AGESTIC) e do Consello
Territorial de ASIMELEC Galicia, José María López Bourio e José Ramón García
respectivamente, veñen de reunirse coa secretaria xeral de Modernización e
Innovación Tecnolóxica, Mar Pereira, para facerlle chegar unha serie de
propostas sobre o fogar dixital que ambas entidades consideran “necesarias” para potenciar o sector das
TIC no noso país.
Trátase dun documento
que contén unha serie de pautas a seguir para, coa axuda da Xunta de Galicia, “potenciar este importante sector en pleno
crecemento de usuarios e no que o noso país conta con importantes empresas que
desenvolven produtos, contidos e aplicacións”.
O fogar
dixital defínese como o lugar onde as necesidades da familia, en materia de
seguridade e control, comunicacións, ocio, confort, integración medioambiental
e accesibilidade, son atendidas mediante a converxencia de servizos,
infraestruturas e equipamentos; en definitiva un lugar de servizos, “integrado e accesible”.
É por isto
que AGESTIC e ASIMELEC Galicia entenden o fogar dixital para o usuario como “un lugar de servizos que conta con acceso á
solución dos problemas diarios a través do uso das TIC”, así como un “fogar seguro tanto respecto aos perigos
habituais do fogar (auga, electricidade, gas…) como respecto á intrusión de
persoas alleas”.
Asemade, para
os responsables das devanditas entidades, o fogar dixital tamén é “un fogar controlado e comunicado”, no
sentido de que permite coñecer o que sucede tanto no exterior como no interior
en tempo real, exercendo control sobre os diferentes sistemas de iluminación, teleasistencia
ou calquera outra instalación básica.
Xa que logo,
a mensaxe que estas entidades lle transmiten á SXMIT coa súa proposta é que “a nova vivenda non é pensable se non ofrece
novas capacidades en materia de aforro energético, seguridade e teleasistencia,
confort, entretemento e accesibilidade”.
Partindo desta premisa, ASIMELEC E AGESTIC
propoñen:
Crear un Centro demostrador tecnolóxico permanente do fogar dixital en
Galicia, aberto a todos os produtos, servizos e tecnoloxías propios destes
fogares e onde conflúen diferentes axentes, empresas, público e tecnoloxía.
Crear un Observatorio do fogar dixital en Galicia que realice informes
periódicos de vixilancia tecnolóxica do sector.
Crear un Máster do Fogar Dixital así como cursos formativos a outros niveis
non universitarios.
Realizar tarefas de divulgación e
difusión dirixidas á cidadanía sobre o concepto de FD e os seus beneficios.
Crear un galadón para premiar ás
mellores instalacións domóticas ou do FD, a fin de fomentar o desenvolvemento e
uso desta tecnoloxía, etc.
Asemade, no documento entregado á SXMIT
propoñen a convocatoria dunha serie de axudas que van dende axudas económicas
para a instalación deste tipo de servizos ata axudas á creación de empresas
tecnolóxicas, pasando por subvencións e becas de formación neste tipo de
proxectos.
Estas propostas, que a xuízo dos seus
precursores “favorecerán o
desenvolvemento dun importante sector empresarial en Galicia e a calidade de
vida da cidadanía”, serán examinadas agora polo Goberno galego, a fin de
desenvolver ou desbotar as que consideren viables.