Prohiben a Uber ter actividade en todo o territorio estatal alemán
martes, 2 de setembro do 2014
A
plataforma de Google para o transporte compartido, Uber, segue a
gañar adeptos e inimigos a partes iguais alí onde se estende. O
servizo, unha aplicación móbil que pon en contacto a usuarios que
buscan fórmulas de consumo colaborativo e unha maneira máis
económica de desprazarse, ten provocado moitas alegrías entre
amplos colectivos que buscan xeitos de aforrar custes en transporte
ao tempo que un menor impacto medio ambiental, e
moito malestar entre profesionais como os taxistas, que ven na
plataforma un “claro inimigo ao seu negocio”. Por exemplo os
taxistas de Barcelona, unha das cidades estatais onde máis adeptos
hai de Uber. Semellante rexeitamento atopámolo estes días na cidade
xermana de Frankfurt, extensíbel a todo o país.
Extensíbel
ademais literalmente, porque a
Audiencia provincial de Frankfurt vén de ditar unha resolución
provisional mediante a que prohibe a Uber ter actividade en todo o
territorio estatal. O auto dado a coñecer este luns primeiro de
setembro, ponse do lado do colectivo de taxistas, que demandou á
compañía de Google por competencia ilegal. Ademais, dun xeito máis
específico, fixa que a ferramenta Uberpop “non pode conectar
viaxeiros sen dispor da licenza que esixe a le do país en materia de
transporte de persoas”.
Lembrar
que Uber está a experimentar en Europa un crecemento ben destacábel,
motivado non só por un fortalecemento da conciencia medio ambiental
dos cidadáns en materia de transporte (trátase de poñérmonos en
contacto uns cos outros para ocupar os tradicionais asentos baleiros)
senón tamén (e sobre todo) pola escalada de prezos do combustíbel
e polo tanto dos prezos do transporte. Os responsábeis de Uber
sinalaron recentemente que xa foron quen de multiplicar por un número
elevado a súa cifra de clientes, engadindo (por exemplo) que o
número de inscricións do seu servizo en Londres fora quen de
incrementarse a segunda semana de xuño nun 850 por cento, en
comparación coa primeira semana. En palabras de Uber, está claro
que a xente quere servizos novos e innovadores, servizos que unan as
vantaxes de convocatoria e colaboración das redes actuais coas
tendencias que se impoñen de transporte sustentábel e eficiente.
Porén,
esta mensaxe segue a chocar de fronte contra os intereses dos
colectivos de traslado de viaxeiros. Froito disto é a resolución da
audiencia de Frankfurt, que condena á empresa a pagar 250.000 euros
e mesmo se deixa a porta aberta para a detención dos responsábeis
do servizo, que por certo xa fixeron saber que recorrerán o auto.
Os taxistas alemáns denuncian que a plataforma obteña cartos “sen
investir e sen asumir responsabilidade algunha, xa que os condutores
están supervisados nin asegurados, co que non contan con ningún
tipo de protección”, fixeron saber.