Presentan unha capa de realidade aumentada sobre o Camiño de Santiago

A empresa compostelá Signo leva un tempo desenvolvendo unha capa de realidade aumentada sobre o Camiño de Santiago para a aplicación Layar (dispoñible para multitude de terminais móbiles dotados de GPS e compás dixital), e finalmente este traballo chegou a bo porto, presentándose esta mañá por parte do director xerente da S.A. de Xestión do Plan Xacobeo, Ignacio Santos, quen defendeu que as TIC «son unha ferramenta idónea para a transmisión dos valores e o enriquecemento que supón a experiencia do Camiño de Santiago».
A aplicación móbil contribuirá a que o Camiño de Santiago transcenda á celebración deste Ano Santo, así como a levar os contidos da páxina web do Xacobeo a novos soportes.
A capa de información sobre o Camiño presentada a través de Layar achega aos camiñantes con smartphones compatibles a posibilidade de acceder a información en tempo real sobre albergues, programación ou puntos de interese. Aínda que estes contidos son de balde, é preciso rexistrase coma usuario na páxina web do Xacobeo para poder acceder aos mesmos dende o móbil.

A presentación da capa de realidade aumentada sobre o Camiño vista polas cámaras de Correo TV