Popcorn Buzz, aplicación de balde para chamadas en grupos de até 200
mércores, 3 de xuño do 2015
A compañía Line
anunciou estes días o lanzamento dunha aplicación de balde para
chamadas en grupo de até 200 participantes. A ferramenta, deseñada
de maneira específica para dispositivos intelixentes, chámase
Popcorn Buzz e, segundo engade Line, abre a marxe para obtermos unha
cifra de participantes (amigos, familiares, compañeiros de clase,
traballadores da nosa empresa) nas nosas comunicacións nunca vista
até o de agora. “Popcorn Buzz”, explican os responsábeis do seu
desenvolvemento, “é unha alternativa perfecta para os sistemas de
chamadas multitudinarias no ámbito empresarial e, ademais, axústase
tanto ao uso persoal como ao profesional”.
Para tirar partido de
Popcorn Buzz, dispoñíbel
polo de agora para Android, temos que introducir o noso nome de
usuario e subirmos unha foto de perfil. Despois, podemos xerar e
enviar unha URL (diferente en cada chamada) ou ben por correo
electrónico, por mensaxe de texto ou por calquera outro medio de
comunicación que elixamos, podendo así empezar a chamada en grupo.
Ademais, aos usuarios que xa teñan conta en Line permíteselles
iniciar sesión en Popcorn Buzz coa súa conta previa, “sincronizando
de forma inmediata a súa listaxe de amizades e podendo realizar
chamadas en grupo cos seus contactos de Line”.
Popcorn Buzz estará
dispoñíbel en breve para iPhone, e incorporará novas
características, tales como grupos de vídeo chamadas ou interacción
con outros grupos de Line. Pódense realizar chamadas a través de
Wi-Fi e da rede 3G e 4G.
