Os xogos descargables no Bazar de Xbox LIVE disparan o seu tamaño

O xogo Watchmen: El Fin Está Cerca ocupa 1,2 Gb

O Bazar de Xbox LIVE dá cabida a moitos títulos pensados para a súa venda coma descarga, habitualmente considerados coma xogos pequenos, polo que Microsoft limitaba inicialmente o seu tamaño a 50 Mb, para logo amplialo a 150 Mb. A presión dos distintos desenvolvedores levou a que puxesen o límite en 250 Mb e agora coméntase que o tope de tamaño ordinario sería aproximadamente de 350 Mb… con excepcións.
Este baile de cifras dá a entender que os xogos descargables xa non son títulos que se limitan a remakes de xogos clásicos ou que serían comparables a xogos para móbil na súa versión para pantalla grande, e comezan a ter un peso moi importante neste negocio, o que quedou claro nos últimos días co lanzamento do primeiro xogo baseado na película de Watchmen (a xeito de precuela) que ocupa ¡1,2 Gb!
Entendemos así que cada vez vai resultando menos relevante o soporte de distribución de xogos, e as compañías buscan nas descargas un aforro de custos e un freo á piratería, de xeito que a Industria vese beneficiada dun xeito significativo (aínda que a expensas do sector da venda e distribución tradicionais).