Os clientes de Coremain tiveron acceso en Santiago ao posto de traballo do futuro

A compañía chinesa Huawei, unha das maiores fabricantes de equipos de telecomunicacións do mundo, presentou este martes 21 de maio en Santiago de Compostela, da man do seu socio tecnolóxico Coremain, o seu escenario móbil para dar a coñecer a súa visión conxunta sobre o noso xeito de traballar (tecnoloxicamente) o día de mañá. Tal e como avanzamos en Código Cero, tratouse dunha oficina itinerante acubillada nun camión colector de grandes dimensións, aberto ao público durante toda a xornada ao carón do Pazo de Congresos e Exposicións, en San Lázaro. O seu interior, en palabras de Coremain, “simulaba unha gran oficina intelixente coas últimas novidades en aplicacións e dispositivos, que farán posible o posto de traballo do futuro”.
Os asistentes, na súa maioría clientes de Coremain, participaron “nun evento único de demostración tecnolóxica” que serviu entre outras cousas para que as dúas compañías deran a coñecer a súa proposta para a vindeira faciana das comunicacións e da información nas empresas, integrando na demostración equipos físicos conectados, escenarios reais e exemplos prácticos personalizados. A oficina acubillou probas con escritorios virtuais (integración de diferentes aplicacións e ferramentas de emprego diario en escritorio remoto), acceso fixo e sen fíos (Wi-Fi) á contorna corporativa dende calquera dispositivo, comunicacións unificadas e traballo en rede (networking). Segundo fixeron saber as dúas firmas, a súa alianza estratéxica, completa o catálogo da área de Infraestrutura de Coremain, “xa que Huawei achegará un amplo abano de solucións cun alto nivel de calidade cunha tecnoloxía punteira en continua evolución”, engadiu Coremain.