Os Simpson introduciranse en Minecraft
xoves, 15 de xaneiro do 2015
Dous grandes fenómenos actuais, o xogo Minecraft e a serie de animación dos Simpson, atoparán un punto de
encontro nas consolas Xbox, xa que Microsoft
vén de anunciar que as edicións para Xbox 360 e Xbox One de Minecraft contará cun contido
descargable baseado nos Simpson, que chegará a finais de febreiro e
incluirá á familia Simpson en completo (Homer, Marge, Bart, Lisa e Maggie) e a
19 personaxes da Escola de Primaria de Springfield.
Phil Spencer, director de Xbox, asegura que “temos unha comunidade activa de
máis de 17 millóns de usuarios de Minecraft
en Xbox LIVE gozando dun amplo abano de contido descargable en Xbox, e estaban
a clamar para que levásemos aos personaxes dos Simpson ao xogo” o que levounos
a pechar un acordo con Twentieth Century Fox e Gracie Films para facer posible
esta curiosa conxunción de franquías de éxito.
O contido descargable dos Simpson para Minecraft
terá un prezo de 1,99 dólares, e aínda que o seu anuncio chegou por parte de
Microsoft, é de agardar que esteamos ante unha simple primicia para Xbox, de
xeito que tamén chegaría a outras plataformas para as que está dispoñible Minecraft, xogo que dende o seu
lanzamento superou os 100 millóns de descargas, o que permite facernos unha
idea da escala deste fenómeno cultural.
