O grupo Pont-e sácalle proveito ás TIC para recadar solidariamente máis de unha tonelada de alimentos
venres, 9 de marzo do 2012
A iniciativa
Pont-e,
unha fronte 2.0 da mocidade do último curso de Publicidade e
Relacións Públicas do Campus de Pontevedra da
que falamos recentemente con motivo do seu reforzamento, está a
achegar bos e importantes froitos solidarios. E todo a través da
participación e un emprego eficaz e rendíbel do Facebook, que é,
por así dicilo, a ferramenta comunicacional por excelencia do grupo
Pont-e. Segundo
se
conta na Web, o grupo promoveu os días pasados unha actividade
para colaborar co Banco de Alimentos. O obxectivo: canalizar o
potencial solidario da cidadanía e o potencial, neste senso, das
novas tecnoloxías da información. A iniciativa chámase Operación
Kilo
e, grazas a ela, xa se recadou máis de unha tonelada de comida:
1.200 quilos. Esta comida irá destinada ao apoio das familias con
menores recursos.
Co fin de acadar
isto, o grupo estivo máis dunha semana mergullado en traballos de
planificación “tanto polas redes
sociais como pola rúa, animando a participar a todo o mundo e
buscando colaboracións que poidan contribuír de forma efectiva”,
salientan as integrantes do colectivo. A campaña de promoción foi
do máis eficaz e, de contado, conseguiuse a implicación de empresas
de primeira liña, como Gadisa, que doará 100 quilos de alimentos,
ou de Corporativa Arbórea e Mundo Verde, que contribuíron á causa
con 20 kg de produtos ecolóxicos. Co fin de afinar ao máximo a
rendibilidade da campaña e prepararse para o día de mañá (a
planificación en liña será un dos eidos a cubrir polas estudantes
que participan en Pont-e),
as responsábeis do grupo botaron man de todo tipo de medios,
formatos e fórmulas, tanto virtuais como físicas. “Empregamos
todos os medios dispoñibles: redes sociais, cadeas de contactos,
marketing
viral, pegada de carteis... para que a acción tivese o maior
alcance posible e non pasase desapercibida para ninguén”,
manifestaron.