O editor galego Iberian Games estrea un dos videoxogos máis difíciles do mundo

Co fenómeno de Flappy Bird quedou claro que a xente seguía a demandar videoxogos cunha mecánica sinxela, pero cun elevado nivel de dificultade, o que encaixa moi ben coas partidas rápidas dende dispositivos móbiles, do que son moi conscientes dende a editora de videoxogos galega Iberian Games, que vén de publicar o seu segundo título en Google Play, Pursued, que adopta unha estética minimalista propia das primeiras máquinas recreativas e dos xogos dos primeiros ordenadores persoais que convida a amosar a nosa habilidade guiando a un punto pola pantalla superando misións ao longo de 50 niveis dunha dificultade extrema.
O xogo parece bastante sinxelo, cun punto que ten que recoller unhas faragullas dispersas no mapa de cada nivel, evitando os obstáculo e tamén outros puntos inimigos que o perseguen, para o que hai que acelerar, recortar e driblar, amosando a habilidade do xogador mediante xestos táctiles na pantalla do seu dispositivos móbil con Android 2.3 ou superior.
Este xogo de balde presume de ser un dos máis difíciles do mundo, convertendo cada reto nunha mestura entre a habilidade do control e o quebracabezas mental. Aínda que os que nas súas primeiras partidas pensen que están ante un xogo imposible, dende Iberian Games publicaron un vídeo no que demostran que os distintos niveis poden superarse de acadarmos o dominio suficiente do mesmo: