O IGC desenvolve unha ferramenta que ensina a consumir de xeito responsable pola Rede
venres, 29 de agosto do 2008
O Instituto
Galego de Consumo, dependente da Consellaría de Innovación e Industria, vén
de desenvolver un programa informático para traballar distintos aspectos de
seguridade e garantías coas compras en Internet que, entre outras cousas, conta
cunha tenda virtual, un módulo de correo electrónico, un portal bancario e un
módulo de atención telefónica, que simulan un contorno real de comercio electrónico.
Logo de poñelo en práctica con éxito dentro da programación educativa da Escola
Galega de Consumo do IGC, técnicos do Instituto están a dalo a coñecer noutras
comunidades autónomas como Asturias e na Rioxa, onde se presentou na sede da
Axencia de Sanidade e Consumo de Oviedo e en Logroño co gallo da celebración do
Día Internacional de Internet, respectivamente.
A devandita xornada consistiu na realización de distintos
obradoiros a través dun simulador de
compras en liña, unha ferramenta da que dispón o centro permanente de formación
do Instituto Galego de Consumo para traballar sobre os dereitos e os deberes
das persoas consumidoras en relación á compra de produtos a través de Internet.
Nesta ocasión participaron técnicos da Axencia de Consumo de
Asturias e monitores dos catro Centros de Formación en Consumo (CFC) que
funcionan no Principado, que mostraron o seu interese nesta novidosa ferramenta
e destacaron o seu carácter práctico así
como a utilidade das temáticas que nela se traballan, “habida conta que as compras a distancia están cada vez máis estendidas
na nosa sociedade”, aseguraron.
Na imaxe, o acto de presentación da ferramenta en Asturias.
