O Concurso de Proxectos Empresariais Innovadores incrementa a contía dos seus premios

Ata un total de 22.000 euros en metálico e máis outros 24.000 máis de financiamento mediante préstamo participativo serán as cantidades que se poderán repartir os universitarios e investigadores galegos que acaden algún premio na edición deste ano do Concurso de Proxectos Empresariais Innovadores da USC, convocado pola entidade académica a través do seu programa de fomento da cultura emprendedora Uniemprende.
O concurso, que celebra xa a súa novena edición, contempla este ano cinco categorías diferenciadas, entre as que destaca a denominada de Base Tecnolóxica, dotada cun premio de 9.000 euros e ata 24.000 euros de financiamento participativo.
No resto das categorías, os premios á Empresa Xove, Muller Emprendedora, Proxecto Medioambiental e o do Proxecto con Sensibilidade Social completan a convocatoria con 2.000 euros cada un.
O xurado encargado de xulgar os proxectos prestará especial atención á súa viabilidade, grao de innovación do produto, proceso ou servizo, volume de emprego proxectado, carácter multidisciplinario do equipo de promotores e atención ás políticas de igualdade que contemplen cada un dos proxectos presentados, independentemente da categoría á que concorra.
Como apuntamos anteriomente en Código Cero con motivo da súa convocatoria, o concurso está aberto tanto a estudantes e titulados de calquera das tres universidades galegas como dos centros asociados da UNED en Galicia con independencia da área de coñecemento que individualmente ou en equipo teñan un proxecto empresarial innovador con potencialidade para converterse nunha empresa. Tamén poderán concorrer doutores, doutorandos, persoal de investigación e alumnos de terceiro ciclo que traballen en calquera centro de investigación galego, así como empresas xa constituídas ao longo do ano 2008 por promotores co perfil descrito.
As persoas interesadas, que disporán de prazo ata o 27 de febreiro, deberán presentar xunto co currículo dos promotores unha memoria descritiva do proxecto na que conste o título, sector ao que pertence, produtos ou servizos ofertados, análise da competencia, plan comercial e de marketing, recursos humanos, plan de investimentos e financiamento e conta de resultados, sempre tendo en conta un horizonte temporal de cinco anos.