O Campus de Ourense acollerá as II Xornadas do Ciclo a Historia no Medio, un achegamento das TIC ás humanidades

A Facultade de Historia do Campus de Ourense organizará os días 4 e 5 de abril as II Xornadas do Ciclo a Historia no Medio baixo o título A historia a través das novas tecnoloxías. O eixo central deste encontro serán as novas tecnoloxías inseridas no traballo cotián do historiador: aplicacións para teléfonos móbiles sobre patrimonio, reconstrucións tridimensionais de pezas ou xacementos, bases de datos, análises de restos con espectrometría de masas e xeoradares, accións de divulgación nas redes sociais, creación de contidos audiovisuais, etc. Este ciclo -organizado por Beatriz Comendador (decana da Facultade de Historia) xunto coa Delegación de Alumnos e da asociación de titulados e estudantes do centro Alehou- persegue orientar e fomentar a adaptación dos perfís dos titulados ás demandas dos empregadores públicos e privados e complementar a formación dos estudantes fóra das aulas, con contidos de novo desenvolvemento e que aínda non están incorporados aos programas de ensino.
Con este encontro de alumnado e profesionais do sector TIC, as xornadas tamén queren propiciar o desenvolvemento de colaboracións con empresas e institucións en campos multidisciplinares e interdisciplinares, mellorando as expectativas dos estudantes do centro no mercado laboral.
Emporiso, as intervencións dos expertos no eido da transferencia e da tecnoloxía -especialmente vinculados coa área das humanidades- xirarán arredor de catro puntos que serán: a aplicación das novas tecnoloxías na investigación e na promoción do patrimonio histórico, territorial e ambiental; a propiedade intelectual, a transferencia de coñecemento e a comunicación no ámbito das humanidades e a aplicación das novas tecnoloxías á interpretación do patrimonio e no sector audiovisual como ferramenta de difusión cultural. Sinalar que entre os participantes nestas xornadas estarán a docente Anna Amorós, a xornalista Comba Campoy, a arqueóloga Alicia Colmenero, o enxeñeiro en telecomunicacións Martín López Nores, o creativo Xosé Teiga, o técnico do CESGA Emilio Abad, o investigador Enrique Cerrillo e a directora da Otri da Universidade de Vigo, Ángeles López.