O BNG reclama un meirande apoio á programación aberta
venres, 24 de decembro do 2010
O BNG
volveu á carga esta semana nas súas críticas ao Goberno galego polo que
considera unha “falta de vontade”
perante a contratación de software libre, un tipo de programación que os nacionalistas
galegos valoran como especialmente axeitada para a administración galega e, en
termos xenéricos, para calquera outra administración: inclúe menor pago por
licenzas, maior aproveitamento de recursos e substentabilidade e meirande
capacidade de adaptación ás necesidades dos usuarios.
As críticas do BNG viñeron en boa medida da man da deputada Ana Luísa
Bouza (na imaxe), quen lle formulou á Xunta unha pregunta sobre os motivos da contratación
de licenzas de software pechado de Microsoft por un valor de 4 millóns de
euros. A pregunta, por certo, obtivo rápida resposta do Goberno galego, como
reflectimos hoxe nesta mesma
web. Mar Pereira, secretaria xeral de Modernización, fíxolle saber ao BNG
que a aposta polo software libre da Xunta segue a ser firme, e que a compra de
licenzas vén motivada porque non se pode rachar nun día coa infraestrutura
tecnolóxica preexistente na Xunta.
Para o BNG, o apoio a Microsoft e a compra de dereitos invalida os
discursos de apoio á programación libre. Os nacionalistas, neste senso, fan
fincapé en que o problema non é novo. Xa en xuño de 2009, insisten, se deu
conta da adxudicación dun contrato de licenzas Microsoft por valor de máis de 2
millóns de euros a través “dun
procedemento sen publicidade”. Os nacionalistas apuntan a que “máis valería contratar a empresas galegas
con capacidade sobrada para desenvolver software de base en estándares abertos,
o que convertería este gasto público millonario nun investimento produtivo para
Galiza”.
Por certo que en medios como Xornal.com,
incídese en que o pago das licenzas non sería só para renovar os dereitos de
emprego de software xa existente na Xunta, senón tamén para mercar 556 novas.
Sobre esta cuestión e outras, a Xunta lembra que sobran probas sobre o
seu apoio ao software libre, e non só dentro da administración, para o que se
asinaron diversos convenios con compañías galegas de programación aberta, senón
tamén no eido da ensinanza galega. De feito, informa, a totalidade do proxecto
ABALAR, que busca a dixitalización das nosas aulas, apóiase no
emprego de ferramentas de software libre e, a maiores, cunha preferencia do
idioma galego sobre outras linguas.