Núñez Feijoo preside a Noite Galega das Telecomunicacións e da Sociedade da Información no Grove
venres, 26 de outubro do 2012
- O presidente en funcións da Xunta, Alberto Núñez Feijóo, durante a celebración da XVII Noite Galega das Telecomunicacións e da Sociedade da Información 2012
No
marco da XVII Noite Galega das Telecomunicacións e da Sociedade da Información
2012 que organizaron no Gran Hotel de A Toxa o Colexio Oficial e a Asociación de Enxeñeiros de Telecomunicación de Galicia (COETG-AETG), o presidente en funcións da Xunta de
Galicia, Alberto Núñez Feijóo, tivo a ben destacar que “un dos obxectivos estratéxicos da nova
lexislatura será impulsar o sector TIC galego como elemento transformador do
tecido empresarial da Comunidade”, así como que na actual conxuntura económica,
o uso das TIC debe ser un dos instrumentos clave para saírmos reforzados da
crise, grazas ao seu papel transformador das estruturas económicas, sociais e
culturais.
O
presidente da Xunta de Galicia referiuse á Axenda Dixital 2014.gal, “que dous anos despois da súa posta en
marcha conseguiu avanzar na modernización da Administración e da Xustiza; na
transformación do sistema educativo con iniciativas como Abalar; na
vertebración territorial de Galicia grazas ao Plan de Banda Larga; na mellora
continua da sanidade a través de proxectos tecnolóxicos nos que a comunidade é
líder, como a receita electrónica ou o historial electrónico; e apoiando
economicamente grandes proxectos tecnolóxicos innovadores. A estas medidas
uniuse a creación da Axencia para a Modernización Tecnolóxica de Galicia”.
Tamén adiantou que na vindeira lexislatura aprobarán a Lei de desenvolvemento
dixital de Galicia, que permitirá que a nosa comunidade continúe nunha boa
posición no impulso das redes de telecomunicacións de alta velocidade na liña
coas directrices marcadas pola Unión Europea, que establece que para o ano 2020
o 100% da poboación poida gozar de conexións á Rede de 30 Mbps e o 50% a 100
Mbps. Así mesmo, destacou a blindaxe das telecomunicacións como un servizo
público máis para todos os galegos “e
para conseguilo daremos continuidade á tramitación da Lei de impulso e
ordenación das infraestruturas de telecomunicacións de Galicia”.
- Tradicional fotografía familiar tomada durante o encontro