Nintendo adianta varias das novidades de Mario Kart 8

O vindeiro 30 de maio o agardado Mario Kart 8 para Wii U chegará ás tendas físicas e á Nintendo eShop, sendo a primeira incursión da saga na alta definición, aínda que moitos tamén agradecerán as súas posibilidades multi-xogador, que permiten a 4 xogadores retarse en local e participar en competicións de ata 12 xogadores en liña.
Aproveitando a proximidade do lanzamento do xogo de carreiras de Mario, Nintendo desvelou hoxe algunhas das novas características que terá como o Spin Turbo (poder circular boca abaixo ou polas paredes), o regreso de varios personaxes (aparte dos xa anunciados, tamén poderemos elixir como pilotos ao Mario de metal, a Lakitu e a Shy Guy), novos obxectos (a planta piraña e a flor boomerang), novos circuítos (o xogo terá 16 circuítos totalmente novos e outros 16 circuítos clásicos remesturados), música gravada en directo e diversidade de controis (poderase elixir entre o Wii U GamePad, o mando Pro de Wii U, o Wii Wheel e o mando de Wii con Nunchuk para controlar o xogo, sendo incluso posible gozar do mesmo sen televisor, directamente no Wii U GamePad).