Nintendo Selects incorporará 4 novos xogos a finais de setembro

Ante a falta de grandes novos títulos para Wii U, facerse con algúns dos seus clásicos parece unha boa opción, especialmente agora que Nintendo confirma que o 30 de setembro incorporará 4 novos xogos á súa serie Nintendo Selects, de xeito que poderemos facernos con Captain Toad: Treasure Tracker, Pikmin 3, Super Mario 3D World e Mario Party 10, á venda actualmente por prezos de entre 39,99 e 59,99 euros, e que pasarán a custar oficialmente 19,99 euros, polo que será unha magnífica oportunidade para quen os deixase pasar no seu día.

Novidades para as consolas portátiles

Outra interesante novidade de Nintendo é que a partires do 7 de outubro porá á venda dos novos lotes da consola portátil Nintendo 2DS con xogos preinstalados. Concretamente falamos dunha 2DS de cor azul con éxito dos últimos meses, Yo-kai Watch (do que tamén haberá unha edición limitada a partires do 16 de setembro cunha medalla Yo-kai) e unha 2DS rosa con Nintendo presenta: New Style Boutique 2 - ¡Marca Tendencias!. Dá a impresión de que con estes lanzamentos a compañía xaponesa procura posicionarse de cara á campaña de Nadal, sabendo que ambos xogos teñen unha elevada demanda, e preparando un xeito económico de adquirilos para usuarios que aínda non teñan unha consola portátil de Nintendo.
Nos últimos meses está a trunfar Yo-kai Watch, franquía de animación xaponesa que disparou as vendas de xogos en España tras a estrea da súa serie de televisión, e que curiosamente non van esperar para continuar a explotar comercialmente dende Nintendo, de xeito que en primavera xa se confirmou que en Europa teremos os xogos para Nintendo 3DS Yo-kai Watch 2: Bony Spirits e Yo-kai Watch 2: Fleshy Souls (dando a impresión de que quere imitar a fórmula de comercialización dos xogos de Pokémon).