Netflix culpa a Movistar dos problemas de calidade do seu servizo en España
xoves, 19 de novembro do 2015
Tras a chegada de Netflix a España cobrou moita relevancia o
debate sobre a neutralidade da Rede xa que daba a impresión de que podiamos ter
diante un caso de discriminación do tráfico dun servizo audiovisual, xa que numerosos
clientes de conexións de fibra óptica de Movistar denunciaban que durante o
horario de prime time non podían
gozar satisfactoriamente do servizo, xa que o recibían con pouca calidade,
sendo incluso imposible reproducir os vídeos en alta definición, o que
resultaba inaceptable para conexións de 300 Mbps, e aínda que dende Movistar
deixaron claro que non estaban a discriminar o tráfico de Netflix, parece
evidente que as redes de ambas compañías non están ben conectadas, o que
provoca os problemas que padecen os usuarios finais e que segundo Netflix
terían unha doada solución, de aí que acusan a Movistar das incidencias.
Concretamente o vicepresidente e responsable de comunicacións para Europa,
Oriente Próximo e África de Netflix, Jories Evers, é que asegura que son conscientes
dos problemas de calidade na rede de Movistar/Telefónica durante as horas punta
das noites, o que provoca que non se reproduzan os vídeos con calidade e tarden
en iniciarse, e detalla que antes do lanzamento de Netflix no noso territorio
contactaron cos operadores locais ofrecéndolles a posibilidade de conectar coa
súa rede sen custos, o que aceptaron o resto de provedores, pero Movistar non.
A rede de distribución de contidos de Netflix (Netflix Open Connect) conta cun
punto de presenza en Interxion en Madrid, instalación na que a rede de
Telefónica/Movistar tamén está presente, polo que a conexión entre ambas redes
seria realmente sinxela, polo que só faltaría vontade por parte do operador
para facelo.
Ao parecer, Movistar pretende cobrar a Netflix para mellorar a conexión entre
as súas redes, o que non consideran aceptable dende o provedor de vídeo baixo
demanda (considerando que este tipo de política resulta perigoso, creando unha
discriminación dos servizos en liña que iría contra o principio de neutralidade
que defenden), polo que instan
aos clientes de Movistar a amosar o seu descontento á súa compañía e ante
os defensores dos consumidores locais.
Tamén adianta Evers que o vindeiro 14 de decembro publicarán o seu Índice de
Velocidade dos Provedores de Servizos de Internet incluíndo os datos de España,
Italia e Portugal, e que actualizarase mensualmente, de xeito que os
consumidores poderán saber os provedores que ofrecen a mellor calidade de
Netflix en hora punta, e no que claramente Movistar quedará en mal lugar por
decisión propia.