Microsoft defende a política de licenzas da Xbox One
xoves, 13 de xuño do 2013
A Xbox One de Microsoft está a ser moi polémica polos
grandes cambios que supón para o mundo das videoconsolas (con medidas que, por
outra banda, hai anos que se aplican no sector do PC), dando especialmente que
falar a política relativa ao préstamo de xogos e á venda de segunda man, pero
dende Microsoft defenden o seu novo modelo de licenzas para os xogos, que
consideran que son moi razoables, aínda que aseguran entender as críticas polo
grande cambio que supón non ter que meter o disco dun xogo na consola para
botar unha partida.
Yusuf Mehdi, xefe de marketing de Xbox, asegurou que “estamos intentado facer algo realmente grande en termos de levar a
industria adiante no mundo dixital. Cremos que o dixital é o futuro, e cremos
que é mellor”, comparando o que buscan facer cos videoxogos co que pasou co
consumo de vídeo (agora xa non temos que ir ao videoclub para alugar
películas). Tamén detallou que a
Xbox One permitirá compartir os xogos dixital e remotamente con ata 10 membros
da familia (detallando que esta relación de confianza non se refire a
consanguinidade, polo que podería aplicarse aos nosos mellores amigos sen
problema, coa limitación de que só poderá empregar a copia dixital unha persoa
de cada vez), facilitando tamén que poidamos gozar dos nosos xogos en casa dos
amigos... e sen ter que cargar co orixinal, pois as licenzas dos xogos estarán
na nube, e poderá comprobarse cales son os nosos xogos en calquera momento.
Sobre a segunda man, Mehdi asegura que só está a pór as ferramentas para
controlar ese mercado nas mans do editores, que serán os que teñan a última
palabra. Nun principio Microsoft só estaría a buscar un equilibrio entre o
beneficio que acadan as tendas coa venda en segunda man e os ingresos das
compañías que crean os videoxogos. De feito, de querer adoptar medidas máis
drásticas, Microsoft podería ter optado por unha solución sen discos, na liña do que acontece con iOS e Android, onde os
xogos carecen de soporte físico, pero preferiron manter os discos, aínda que permitindo
tamén a opción de mercar os xogos directamente en dixital.