MeteoGalicia estrea aplicación móbil para Android

MeteoGalicia, xunto co Grupo de Arquitectura de Computadores da Universidade da Coruña, o Laboratorio de Sistemas da Universidade de Santiago de Compostela e o Centro de Supercomputación de Galicia (CESGA), veñen de publicar a aplicación para terminais móbiles Android MeteoSIX Mobile, que permite o acceso a predicións numéricas, tanto meteorolóxicas coma oceanográficas, para calquera punto de Galicia, podendo localizar as consultas no mapa (e gardalas en favoritos) ou facendo uso do GPS do móbil para indicar a nosa posición actual.
O sistema amosa variables como o estado do ceo, a temperatura, as precipitacións, a velocidade e dirección do vento, a cota de neve, a cantidade de neve a humidade relativa, a cobertura nubosa, a presión, a altura e dirección de onda, a temperatura da auga e a salinidade da auga.
Aparte dun acceso da aplicación a pantalla completa, tamén é posible executala coma un widget, de xeito que se facilita a súa consulta dende o propio escritorio dos móbiles con Android.
Esta ferramenta desenvolveuse dentro do Proxecto MeteoSIX, que facilita o acceso aos datos meteorolóxicos e oceanográfica cos que traballa MeteoGalicia en cumprimento coa directiva INSPIRE.