Google podería estar a desenvolver un sistema operativo para móbiles

Nos últimos meses se vían na Internet deseños de terminais de telefonía móbil que poderían converterse no GPhone, ou sexa, no móbil de Google, pero no The New York Times publican que tal información era incorrecta, e o que buscaría a compañía de Mountain View sería a creación dun sistema operativo para móbiles que lle permite levar a súa plataforma publicitaria na web ós móbiles do futuro.
Estariamos a falar dun sistema que se sostería en servizos coma Gmail e Google Maps, aínda que para iso será preciso que cambien os modelos tarifarios da telefonía móbil (que se agarda que tenda ás tarifas planas de datos ou a uns prezos moito menores ós actuais).
Moitos analistas ven complicado que Google poida levar o seu éxito na Rede ós móbiles, en boa medida porque este segundo mercado xa é feudo dunha serie de operadoras que poderían oporse ó buscador, e que hoxe a teñen atendidas as súas demandas de sistemas operativos móbiles coma o Windows Mobile ou o Symbian, sen deixar que outra empresa entre nun xogo que promete ser moi rendible nos vindeiros anos.