Google fai de balde a aplicación Quickoffice

Hai pouco máis dun ano Google adquiriu a empresa que desenvolvía a aplicación móbil Quickoffice e dende hoxe ofrécea de balde nas súas versións para Android e para iOS, facilitando a edición de documentos compatibles con Microsoft Office dende dispositivos móbiles, achegando unha maior liberdade ao usuario á hora de traballar cos seus documentos dende distinto hardware.
Quickoffice está integrado co almacenamento de Google Drive, facilitando o acceso aos documentos dende calquera lugar e, os usuarios que se identifiquen nesta aplicación antes do 26 de setembro conseguirán 10 Gb de espazo adicional durante 2 anos na súa conta de Google Drive (espazo que engadirase nas vindeiras semanas).
A aplicación móbil Quickoffice permite crear e modificar arquivos de Word, Excel e PowerPoint; acceder a arquivos gardados en Google Drive e no noso dispositivo móbil; abrir e ver documentos PDF, compartir arquivos a través de cartafoles compartidos en Google Drive; e adxuntar arquivos a correos electrónicos.