Expertos de media ducia de países europeos falarán en Vigo do que nos agarda en materia de eAdministración
xoves, 10 de outubro do 2013
A conferencia MeTTeG
2013, que
como avanzamos os días pasados vaise celebrar en Vigo a vindeira
semana (17 e 18 de outubro), semella querer consolidarse como
unha boa alternativa para afondarmos no estado de cousas da
Administración Electrónica: cara a onde se dirixiu, que pasos deu,
cales serán os camiños máis axeitados a tomar, está a acadar de
verdade froitos de valor para a cidadanía (uso máis eficiente dos
servizos públicos)? A conferencia, segundo fan saber os seus
organizadores, tratará
estas cuestións en profundidade e tamén outras cuestións que están
relacionadas co devandito e que ocupan os chanzos superiores da
escada da eAdministración. Cousas como as cidades intelixentes
ou o open data (datos dispoñíbeis de xeito libre sen
licencias ou patentes).
A xuntanza MeTTeG
2013, Conference on Methodologies, Technologies and Tools enabling
e-Government, reunirá
expertos dos devanditos eidos procedentes de España, Holanda,
Italia, Suíza, Suecia, Bélxica e Hungría. O congreso vén da man
dos investigadores do Grupo de Enxeñaría de Sistemas Telemáticos
co soporte do Concello de Vigo e a Rede Galega de Procesamento da
Linguaxe e Recuperación da Información. Trátase da segunda vez que
este congreso se celebra en Vigo, tras
unha anterior edición na cidade en 2009 que tivemos ocasión de
reflectir en Código Cero facendo fincapé nos éxitos e nas
eivas que daquela estaba a amosar o proceso de dixitalización das
institucións públicas e as súas canles de comunicación coa
cidadanía.
O xermolo destes
congresos, informa a Universidade de Vigo, xurdiu en 2007 e abrollou
logo en Italia para debater a fondo, cun cariz internacional, sobre o
concepto de eGovernment. A xuntanza está proxectada, como
explica Luis Álvarez Sabucedo, membro do comité organizador, “como
un foro de reunión de académicos, empresas e administracións
públicas interesadas en como tirar o máximo proveito das TIC e dos
novos paradigmas da información para mellorar o servizo aos cidadáns
e entre administracións”. Nesta sétima edición os relatorios
centraranse en temáticas concretas como as smart cities, o
open data, a seguridade e privacidade, a e-participación e os
modelos conceptuais de servizo. “O noso obxectivo”, explica
Álvarez Sabucedo á UVigo, “é que sexan unhas xornadas abertas e
de interese para todo tipo de público, para todos aqueles que
queiran ter unha idea do que podemos atoparnos nos vindeiros anos
neste sector”.
Como lembraremos, o
congreso contará con dúas conferencias convidadas, a primeira delas
a cargo da directora do Centro de Investigación AtlantTIC, Nuria
González Prelcic, levará por título Smart management of
protected areas: an opportunity for interdisciplinary research e
será o relatorio inaugural. A segunda conferencia será impartida
por Richard Stallman, fundador e líder da Free Software Foundation,
considerado un revolucionario da informática e responsable do
proxecto GNU. Stallman é creador do software libre e do concepto
copyleft, un tipo de licenza de software que asegura que este sempre
fique libre e o seu uso e modificacións revertan na comunidade. Por
problemas de datas, esta intervención terá lugar con posterioridade
ao propio congreso e celebrarase o 9 de decembro e será de libre
acceso, aínda que os inscritos no congreso terán condicións de
acceso preferente.