O congreso MeTTeG chega á sétima edición e faino en Vigo

Richard Stallman será sen dúbida unha das estrelas da xuntanza programada en Vigo

A vindeira semana -máis polo miúdo os días 17 e 18 deste mes de outubro- dará comezo o congreso MeTTeG que xa vai pola súa sétima edición. Este ano celebrarase no Hotel Bahía de Vigo e contará con diversos relatorios que xirarán arredor do eido da Administración Dixital, deténdose en aspectos como as cidades intelixentes, o Open Data, a seguridade e privacidade das comunicación, etc... Asemade, nesta sétima edición do MeTTEG -e como evento anexo ao congreso- levarase a cabo unha conferencia presidida por Richard Stallman, a celebrar o 9 de decembro. Cómpre dicir que a dita conferencia será aberta para todo o público interesado contando con acceso prioritario as persoas rexistradas en MeTTeG 2013.
En canto ao protagonista da xornada do 9 de decembro, cómpre dicir que é o responsábel do lanzamento do denominado movemento software libre no 1983 e do desenvolvemento do sistema operativo GNU no 1984. E que é iso do GNU? Para quen a estas alturas aínda descoñeza o que se agocha tras a verba GNU, dicir que non estamos a falar do antílope africano (aínda que este sexa a mascota do sistema operativo), GNU é o mesmo que dicir software libre, isto é: todo o mundo é libre de copialo e distribuílo, así como tamén de realizar cambios de meirande ou menor magnitude. O sistema GNU/Linux é arestora empregado en decenas de milleiros de computadores.
Engadir que Richard Stallman recibiu o premio Grace Hopper da ACM (ACM Grace Hopper Award), unha bolsa da Fundación MacArthur, o premio Pioneiro da Fundación Fronteira Electrónica e o premio Takeda pola Mellora Social/Económica, así como tamén varios doutorados honorarios.