Eloy Velasco, xuíz da Audiencia Nacional, participará nos encontros de informática xudicial que prepara o CPETIG

O Colexio Profesional de Enxeñaría Técnica en Informática de Galicia (CPETIG) vén de anunciar importantes novidades no programa de contidos e relatorios das primeiras Xornadas de Informática Xudicial e Delitos Informáticos, encontros inseridos dentro do convenio asinado entre o Colexio e a Secretaría Xeral de Modernización e encamiñados a informar aos xuíces e máis aos maxistrados sobre os avances en materia probatoria no eido dos delitos dixitais. Segundo puidemos saber, as ditas xornadas (das que falamos hai pouco nesta mesma páxina), contarán coa presenza de Eloy Velasco, maxistrado xuíz da Audiencia Nacional, quen participará no desenvolvemento dos encontros cun relatorio sobre A investigación de delitos por Internet e outras novas tecnoloxías.
As xornadas, que se celebrarán o vindeiro 5 de xuño no Talaso Hotel Louxo da Toxa, amplían e reforzan coa presenza do devandito maxistrado xuíz os seus obxectivos de formación tecnolóxico-xudicial. De feito, informa o CPETIG, Velasco é un dos máis salientables expertos do Estado no eido dos delitos informáticos, e ao longo da súa traxectoria profesional (que na Audiencia Nacional arrincou en 2008) ten levado casos como o Saqueo de Marbella, o enaltecemento do terrorismo por parte de Arnaldo Otegui ou a investigación sobre a relación entre ETA e as FARC.