Desvelan os xogos de PS Plus que chegarán en novembro

Sony anunciou os xogos que os subscritores de PlayStation Plus recibirán no mes de novembro, servizo que a partir de agora combinará xogos de PS4 e PS5 e tamén abrirá o acceso aos usuarios de PS5 da PlayStation Plus Collection (unha selección de clásicos de PS4 que axudarán a ter un bo catálogo de xogos dos que gozar na consola nova).
Os xogos de PS Plus de novembro para PlayStation 4 serán un par de títulos bastante relevantes: La Tierra Media: Sombras de Guerra (xogo inspirado no universo fantástico creado por Tolkien) e Hollow Knight: Edición Corazón Vacío (xogo de plataformas de exploración 2D), que estarán dispoñibles entre o 3 e o 30 de novembro; mentres que os propietarios dunha PlayStation 5 recibirán o xogo Bugsnax.

PlayStation Plus Collection

Pero o máis rechamante de novembro será a estrea da PlayStation Plus Collection cando chegue a PS5 ás tendas (o 19 de novembro), que incluirá inicialmente 20 xogos que definiron a actual xeración de consolas e que estarán dispoñibles sen custo adicional dende a consola de nova xeración.
Esta selección de xogos incluirá 10 xogos de estudios Sony Worldwide Studios (Bloodborne, Days Gone, Detroit: Become Human, God of War, Infamous Second Son, Ratchet and Clank, The Last Guardian, The Last of Us Remastered, Until Dawn e Uncharted 4: El Desenlace del Ladrón) e doutros estudios teñen outros 10 xogos (Batman: Arkham Knight, Battlefield 1, Call of Duty: Black Ops III – Zombies Chronicles Edition, Crash Bandicoot N. Sane Trilogy, Fallout 4, Final Fantasy XV Royal Edition, Monster Hunter: World, Mortal Kombat X, Persona 5 e Resident Evil 7 biohazard).
Cómpre salientar que os xogos de PS4 correrán en PS5 con algunhas vantaxes como uns tempos de carga reducidos e pequenas melloras a nivel de velocidade de refresco, pero non serán remasterizacións, que nalgúns casos chegarán no futuro (hai xogos como Marvel’s Spider-Man que xa confirmaron que terán versión mellorada para PS5, pero non poderá conseguirse de balde de contarmos coa versión de PS4).