Constitúese a Rede Galega de Incubadoras Tecnolóxicas
luns, 19 de xaneiro do 2009
- Salustiano Mato, Mª José Alonso e Gustavo Marcos durante o acto de constitución da Rede Galega de Incubadoras Tecnolóxicas
Este
luns a Casa Europa acolleu a xuntanza de
constitución da Rede Galega de Incubadoras Tecnolóxicas, nunha xuntanza
impulsada por Uninova na que tamén participaron outras entidades galegas de
apoio á incubación de carácter tecnolóxico.
O obxectivo da nova rede é sensibilizar e formar ao persoal directivo e técnico
das incubadoras na xestión da I+D+i para acadar unha mellor difusión destes
conceptos e do seu funcionamento.
No acto participaron Mª José Alonso, vicerreitora de Investigación da
Universidade de Santiago de Compostela ; e Salustiano Mato, director xeral de
Investigación, Desenvolvemento e Innovación, quen asegurou que as incubadoras xa
non poden conformarse con ser «acolledores
e caseiros» das empresas e «deben comezar a ser socios estratéxicos»
e prestar servizos de valor engadido, que permitan cubrir as distintas etapas
de consolidación das futuras sociedades agora tuteladas.
Pola súa banda, Gustavo Marcos, responsable da incubadora de empresas da USC
(Uninova), apostou
por ofrecer «o máximo rigor» aos
emprendedores galegos con «bos plans de
proxecto» e «asegurar unha boa quenda
de financiamento» para «atender as
súas necesidades de mercado» ante a crise e «estimular novas iniciativas empresariais». Tamén explicou que o
traballo conxunto das incubadoras «permitirá
que o equipo directivo de cada unha poida incorporar técnicas de xestión das
demais» e así, «estudar distintas
metodoloxías de traballo» o que suporá «diferentes beneficios en común».
- Á xuntanza celebrada na Casa Europa asistiron as incubadoras de empresas de base tecnolóxica implantadas na actualidade en Galicia
