Chuza! pon en marcha un sitio web de preguntas e respostas colaborativo
luns, 23 de marzo do 2015
A Asociación Cultural
Chuza! informou os días pasados da posta en marcha dun novo proxecto
de seu. Trátase dun sitio web de preguntas e respostas, ao estilo de
Quora ou StackOverflow, colaborativo (colaboracións técnicas e
ligadas aos contidos), que
sirva entre outras cousas para albiscar e fixar posíbeis futuros
para o proxecto Chuza!, agora que a
Taxa Google obriga aos seus impulsores a deter temporalmente o
proxecto, aclarar a súa situación legal e dar cunha solución
alternativa ao pago do canon que impón a dita taxa a unha asociación
privada (AEDE)
beneficiada polo Goberno central.
Como lembraremos, a reforma
da Lei de Propiedade Intelectual aprobada o pasado mes de outubro
habilita unha compensación económica para editores de novas pola
explotación no ámbito dos agregadores daquelas na Internet. O sexa,
que Chuza! Tería que pagar pola actividade dos seus usuarios
compartindo novas.
Volvendo ao sitio aberto
pola asociación, dicir que inclúe unha
listaxe de correo na que se realizarán as comunicacións da equipa
de traballo, amais dun wiki
específico. O obxectivo é crear unha web que preste un servizo
sen ánimo de lucro. Así nos explican dende Chuza! a situación
actual que motiva a busca de novas propostas e futuros posíbeis:
“Debido á aparición da chamada Taxa Google, que nos obriga a
pagar un canon a unha asociación privada beneficiada polo governo do
estado, a asociación deixa de prestar servizo ao agregador de
noticias, que pasa a ser xerido por unha persoa non residente no
Estado español”. Segundo engaden, o desenvolvemento de Chuza! fica
parado temporalmente, até que se aclare a situación legal. A
intención do colectivo, engaden, é reintegrar Chuza! con Menéame,
mantendo as características da marca galega e, ao mesmo tempo,
beneficiándose do desenvolvemento de Menéame e mesmo colaborando
nese desenvolvemento. “Nestes momentos dánse as condicións
técnicas para lograrmos ese obxectivo, que sería o desexábel para
asegurarmos o futuro da web”, aclara Chuza!, que tamén lembra que
aínda que a asociación naceu coa arela de manter o sitio web do
mesmo nome, está en proceso de converterse nunha “modesta
plataforma de apoio e difusión dos proxectos de código aberto
galegos”. De feito, xa organizaron os seus membros un certame o ano
pasado en colaboración co GPUL e seguen abertos a colaborar tanto
con colectivos como a nivel individual.