Até 300 emprendedores acudiron á presentación de The South Summit no Porto do Molle
luns, 4 de maio do 2015
INCYDE, o Consorcio da
Zona de Francia de Vigo e Spain Startup presentaron a semana pasada
no Porto do Molle (Nigrán) a vindeira edición de The
South Summit, que se celebrará en outubro en Madrid na praza das
Ventas. Conxuntamente coa presentación, até
trescentos emprendedores galegos valoraron a súa participación cos
proxectos de seu de cara á dita competición de startups,
a xuízo dos seus impulsores “sen dúbida a máis importante do sur
de Europa”.
María Benjumea,
fundadora e presidente de Spain Startup, compartiu na xuntanza en
Nigrán o amplo abano de oportunidades que ofrece emprender e
participar en iniciativas como a ela e o seu equipo impulsan, facendo
fincapé en que “non existe un único camiño para pór en marcha
un soño”. Salientou tamén “a importancia de aprender a afrontar
os riscos, atopar os compañeiros de viaxe axeitados e estarmos
abertos ás oportunidades que xorden no camiño”. Logo das
presentacións celebrouse un panel de innovación aberta e novas
empresas e no que participaron, entre outros, Francisco Pino,
socio e director de I+D en Marine Instruments, e Jorge Schnura,
fundador de Tyba, que amosou a súa experiencia para crear este
portal de emprego.
Asemade, seis
responsábeis de empresas que naceron na aceleradora ViaVigo
(Consorcio da Zona Franca) tiveron a oportunidade de presentar os
proxectos desenvolvidos e participar no obradoiro que impartiu Joe
Haslam sobre negocios a través do móbil. Haslam, profesor de
innovación e de novas empresas na IE Business School (amais de
co-fundador de Hot Hotels) explicou o porqué da capacidade do móbil
para “multiplicar por dez as oportunidades de negocio”,
desbancando ás webs para este cometido. E engadiu: “As empresas
deben pensarse primeiro en móbil e en segundo lugar, en web”. Haslam
tamén lle lembrou á audiencia convocada en Nigrán que as mulleres
galegas son as máis emprendedoras de toda España, segundo un estudo
realizado o ano pasado por Spotcap.