Até 229 persoas participan na cata de viños por videoconferencia que se celebra este xoves dende Chantada

Tal e como falamos o outro día, o noso xeito de achegármonos ao viño está a mudar a pasos axigantados, e iso que estamos a falar dun produto tradicional que se leva consumindo na nosa terra dende hai séculos sen grandes variacións. Malia que aínda é cedo para falarmos dun antes e un despois do 11 de marzo no que a cultura enolóxica galega se refire, o certo é que non tódolos días se mobiliza a unha rede de centros de acceso á Rede para dar conta das calidades dun produto a través de videoconferencia e con 229 persoas participando na actividade. Falamos da cata en liña de viños que se celebra mañá dende o Telecentro de Chantada e en comunicación directa co Centro Multimedia de Galicia (Santiago) e cos Telecentros de Oroso, Catoira, Carballo, Tui, Monforte e O Barco.
A actividade, inserida dentro da nova edición da Feira do Viño da dita localidade luguesa, desenvolverase entre as 20.00 e as 22.00 horas. Os obxectivos dos responsables destes puntos de acceso en liña e da dita celebración son duplos: por unha banda apoiar á Feira con tódolos recursos dixitais posibles e, pola outra, dar conta das moitas vantaxes de comunicación e promoción da videoconferencia. Segundo informan, tódolos asistentes a esta cata terán ao seu alcance o material preciso para a mesma, contando todos eles coa axuda e supervisión de Mar Vilanova, enóloga e investigadora do CSIC, quen dende o Telecentro chantadino será a encargada de abrir o acto e dar paso á cata guiada dos viños desa subzona, durante a cal todos os presentes poderán formular as súas dúbidas e experiencias, valéndose das vantaxes e posibilidades que lles ofrecen as novas tecnoloxías.