Apple estrea servidor de vídeo

Esta semana Apple lanzou oficialmente o seu agardado Final Cut Server, o servidor de vídeo da empresa de Cupertino que se vende xa por 849 euros con licenza para 10 clientes e a 1.699,01 euros para un número de clientes ilimitado.
Final Cut Server é unha ferramenta que permite facilitar e aforrar tempo na produción de traballos en vídeo, incluíndo un catalogador automático de activos (no que se poden incorporar metadatos) e permitindo a creación de fluxos de traballo, así como entregar os resultados en múltiples formatos.
Este servidor de vídeo é escalable e pode instalarse en ordenadores de Apple con procesador PowerPC G5 a 1,8 GHz e superiores (recomendándose o seu uso con procesadores Intel Core Duo, Core 2 Duo ou Xeon. Na súa parte cliente é compatible tanto con PC coma con Mac, aínda que precisa para o seu funcionamento de tarxetas de vídeo con memoria propia (sendo incompatible cos procesadores gráficos de Intel instalados nos equipos de baixa gama).