A web cetareaburela.com pon o marisco galego en máis de 2.000 fogares
xoves, 17 de marzo do 2011
Peixes e mariscos poden buscarse na Rede tanto
como calquera outro produto, ou se cadra en maior medida, grazas sobre todo ao
moito que se ten avanzado en calidade e inmediatez da oferta e na axilidade da
distribución e do transporte. Así o entenden os responsables dun
(relativamente) novo servizo galego encamiñado a traernos ao fogar, vía
Internet, todo tipo de produtos dun amplo abano de lonxas: Burela, O Grove, Santa
Uxía de Ribeira, Combarro, etc. Estamos a falar da plataforma cetareaburela.com, unha achega que se une á
longa listaxe de propostas galegas para a venda na Rede de peixes e mariscos
das que temos falado en Código Cero. Por exemplo as plataformas eMarisco o
Linamar, esta última recoñecida a nivel
estatal no eido das novas empresas.
Volvendo ao servizo en liña que nos ocupa,
sinalar que a clave de cetareaburela.com, informan os responsables desta páxina,
radica na rapidez do subministro (apenas 24 horas) e no prezo, que “está ao alcance de tódolos petos”. Para
facérmonos unha idea, un quilo de percebes (que en calquera local hostaleiro
valería entre 150 e 200 euros), viría a través de cetareaburela.com a un custe
de apenas 35 euros, sinalan os promotores da iniciativa. “A idea”, engaden, “era
cinguir nun único servizo a calidade indiscutible dos nosos produtos, a tradición
nos xeitos de traballar co marisco e as novas tecnoloxías dispoñibles en
Internet”. Estes e outros factores postos en xogo fixeron posible, entre
outros logros, que a páxina web teña xa unha carteira de dous milleiros de
clientes e, ao longo do ano pasado, 112.000 usuarios únicos, “un 32% máis ca no anterior”. Á súa
disposición, teñen todo tipo de produtos (nécora, camarón, santiaguiño, boi de
mar, navalla, ameixa, percebes, cigala, langosta, centola) a só un click de distancia. Con todo, e como de
costume, a páxina tamén ten as súas carencias, como por exemplo o feito de que
non haxa versión en galego da mesma (cos nomes naturais dos produtos en galego,
no canto de “buey” ou “centollos”), cousa que chama aínda máis atención se
temos en conta que os galegos seguimos a ser moi bos consumidores do noso.
Polo demais, unha boa maneira de facer as
cousas e tirarlles o máximo rendemento á Internet e ás súas ferramentas.