A versión 2.05 de Ágata, a disposición dos artesáns galegos
venres, 17 de abril do 2009
A Fundación Centro Galego da Artesanía e do Deseño,
dependente da Consellaría de Innovación e Industria, vén de
adquirir 300 unidades dunha actualización do programa de xestión Ágata (a
versión 2.05 que é compatible co Windows Vista e cos Mac) para repartilos de
balde entre os obradoiros artesáns que o soliciten.
Esta aplicación, que o devandito organismo público xa puxera
anteriormente a disposición dos obradoiros artesáns inscritos no Rexistro Xeral
da Artesanía de Galicia, está totalmente traducida á nosa língua e permite
xestionar, entre outras cousas, datos dos produtos, dos clientes, dos
provedores, ou dos gastos deste tipo de empresas, de xeito doado e
personalizado.
A Fundación vai comezar a distribuir esta nova versión entre
os obradoiros artesáns que o soliciten a partir do vindeiro luns 27 de abril e
os interesados en obtela deberán enviar unha solicitude a través do correo
electrónico,
indicando os seus datos persoais e a información de contacto do obradoiro.
En poucos días, os usuarios recibirán un CD que inclúe a
nova versión do programa de xestión Ágata así como un manual de usuario en
formato PDF.
Asemade, os responsables da iniciativa veñen de activar un teléfono de contacto no que os usuarios
poderán activar a instalación do seu programa dende o propio obradoiro.
Por outra banda, aqueles obradoiros artesáns que xa estean a
traballa coa versión anterior de Ágata, a 2.03, non precisan solicitar unha
nova versión de momento, xa que non contén outras melloras significativas que
non sexa a adaptación da aplicación aos sistemas operativos mencionados
anteriormente.