A galega Ideaspropias celebra o Día do Libro sorteando un lector de e-books e achegando envíos de balde
luns, 22 de abril do 2013
O selo galego
Ideaspropias
Editorial, moi vencellado á publicación de diversas obras que
nos tocan de preto en Código Cero (como por exemplo os seus manuais
sobre
Windows ou Word,
ou a posta en marcha de
ferramentas de aprendizaxe en liña), súmase ás celebracións
do Día Internacional do Libro e dos Dereitos de Autor (23 de abril)
con dúas accións de promoción da lectura: sorteando un lector de
libros electrónicos e ofrecendo gastos de envío gratuítos a todos
os clientes que realicen unha compra a través do seu servizo de
comercio electrónico.
O sorteo, informa a
empresa con sede en Vigo, realízase a través do blog
corporativo de Ideaspropias Editorial. Tódolos internautas que
desexen participar deben deixar un comentario relativo ao título do
catálogo que lles parece o máis axeitado para a súa profesión,
compartir a entrada no perfil da editorial en Facebook ou Twitter e
facerse seareiro de Ideaspropias nunha destas redes sociais. Esta
iniciativa inscríbese na firme aposta polos contidos dixitais que
está a realizar a editorial, unha estratexia que, segundo informa,
tamén deu como resultado que a totalidade das novidades de
Ideaspropias Editorial (así como un 25 por cento do catálogo 2013)
estea dispoñíbel xa en formato e-book. Segundo engade o selo
vigués, a propia empresa asumirá o custo dos gastos de envío de
tódolos pedidos nacionais que se fagan entre o 15 e o 30 de abril.
Como lembraremos,
Ideaspropias é unha editorial especializada en formación
multisoporte, “cunha visión moderna e innovadora”, en
palabras do propio selo, “que evoluciona de continuo para
adiantarse ás esixencias do mercado.” A súa filosofía está
orientada á calidade nos seus procesos de traballo, contidos e
formatos, un principio que se materializou na obtención da
certificación ISO 9001.