A galega Barrán organiza un curso sobre Drupal en Madrid
martes, 25 de febreiro do 2014
O Grupo
Barrán, empresa galega centrada en servizos tecnolóxicos e
recursos formativos vencellados ao software libre, ten entre mans
unha nova actividade formativa que sumar ás súas achegas recentes
de divulgación sobre
desenvolvemento de xogos para Android e Firefox OS ou sobre
metodoloxías de estratexias de hacking ético. Pois
ben, a empresa de Santiago preséntanos agora un curso sobre Drupal
de 20 horas de duración e amosando a peculiaridade, con respecto aos
devanditos, de que o lugar elixido para o desenvolvemento do curso é
Madrid, coincidindo ademais coa publicación de Linux Espín, o
sistema operativo libre que prepara a empresa galega (con versión
na nosa lingua).
De
feito, informa o Grupo, a idea é aproveitar a estadía en Madrid,
con motivo de impartir o dito curso, “para promover a nosa
distribución libre”. A actividade formativa desenvolverase entre o
21 e o 25 de abril, e responde a unha estratexia da empresa
compostelá por estender ao máximo o seu radio de alcance. De feito,
a idea é levar a cabo actividades e fornecer servizos ao longo e
ancho de todo o territorio estatal.
Polo
que respecta ao curso de Drupal a desenvolver en Madrid (no número
31 da rúa Luchana), dicir que incluirá unha introdución a este
programa libre (dirixido principalmente a facilitar a publicación de
artigos, imaxes, arquivos e servizos engadidos como foros, enquisas,
votacións, blogs e administración de usuarios e permisos), un
achegamento aos procedementos para instalalo e tirarlle partido e
diferentes análises exhaustivas sobre as súas áreas de
administración, de xestión de contidos, de xestión de menús ou de
xestión de bloques. Tamén se tratarán en detalle eidos como a
taxonomía de Drupal, os formatos de texto, a xestión de usuarios ou
ampliación de funcionalidades con módulos.
Xa é posible realizar a inscrición en liña a este curso.