A USC duplicou a súa oferta de revistas electrónicas
xoves, 5 de marzo do 2015
O número de títulos de
revistas
electrónicas accesíbeis dende a Universidade de Santiago, a
través do Consorcio de Bibliotecas Universitarias de Galicia
(Bugalicia) ascenderá
este ano até as 6.626 publicacións. Isto será posíbel, en
parte, grazas ás negociacións coas editoriais especializadas
Elsevier, Springer e Wiley. Segundo informa a USC, todas estas firmas
contan cun paquete de publicacións recoñecido prestixio
internacional, “xa que a maioría están representadas no índice
de referencia Journal Citation Reports con altos factores de
impactos nas súas respectivas disciplinas”.
En termos máis
concretos, o acceso á Freedom Collection de ScienceDirect de
Elsevier permitirá pasar dos 931 títulos dispoñíbeis do pasado
ano aos 1.837 actuais; mentres que de Springer, co acceso aos títulos
da Licenza Cruzada de Institucións Españolas, das 130 cabeceiras de
2014, a oferta increméntase ata o 1.853 títulos en 2015; ao que se
suma o acordo marco con Wiley, que supón pasar de 480 títulos a
1.422.
Segundo engade a USC, “as licenzas de paquete completo
negociadas por Bugalicia ofrecen aos investigadores un maior acceso á
literatura científica, ao tempo que facilitan a difusión de
publicacións e a posibilidade de que se incrementan o número de
citas para cada traballo e autor/a”. O acceso ao catálogo de
e-revistas pódese facer a través da web
da Biblioteca Universitaria.