A Axencia Tributaria de Galicia apoiarase de cheo nas TIC na procura da eficacia
venres, 11 de maio do 2012
Xa está en marcha a
creación da Axencia Tributaria de Galicia que, segundo
informa a Consellería de Facenda, permitirá un aforro de 15 millóns de
euros nos vindeiros catro anos, grazas sobre todo á centralización de
competencias: a máis proximidade e coñecemento do lugar no que se traballa, máis
eficacia e rendibilidade nas tarefas a desenvolver. A creación da Axencia
Tributaria galega (que cinguirá nun único organismo os labores propiamente tributarios,
a liquidación, a xestión, a inspección e a recadación), tamén terá unha serie
de consecuencias tecnolóxicas para a nosa cidadanía. De feito, case todo o que
abrolle dela terá vertente TIC. Dende a información detallada que se nos
achegue até procesos como garantir e fortalecer o control do cumprimento
tributario.
A Axencia, que se
prevé operativa a principios do ano vindeiro, xorde polo tanto cos seguintes
obxectivos: mellorar a calidade e a cantidade dos servizos ofertados aos
contribuíntes, potenciar as novas tecnoloxías para reducir ao mínimo a
burocracia e contar con persoal especializado. “Galicia será a sexta autonomía en contar cun organismo propio destas
características”, informa a Consellería de Facenda, responsábel desta
iniciativa. Nun plano máis específico, os obxectivos pasan por potenciar o uso
e afianzamento das novas tecnoloxías da información “para reducir ao mínimo a burocracia e permitir un aforro de tempo e
custos ao cidadán”. Desta maneira, promoverase a simplificación de
procedementos na presentacións de documentación e nos pagamentos; ademais de
facilitar a información e asistencia necesarias para acadalo. Cómpre lembrar
que a Administración autonómica dispón xa dunha xanela telemática que lle
permite ao contribuínte comunicarse con diferentes rexistros (Propiedade,
Mercantil, etc) e levar a cabo unha serie de trámites relacionados con estes.
Segundo informa Facenda, arestora cóbrese de xeito TIC a totalidade dos trámites
a realizar nestes ámbitos.