Vodafone presenta en MWC tecnoloxías 5G que quintuplican a capacidade das redes previas
luns, 27 de febreiro do 2017
Finalmente
comeza hoxe, e até o 2 de marzo, o Mobile
World Congress 2017. Na cita da FIRA de Barcelona, referencia
mundial para a industria de telecomunicacións (operadoras,
fabricantes, distribuidores, fornecedores de servizos e contidos,
etc), Vodafone comeza especialmente forte presentando unha serie de
novidades importantes. Por
unha banda, a incorporación de tecnoloxías 5G á rede súa 4G,
novas solucións que reducen a latencia en 5 veces e quintuplican a
capacidade das 4G.
Un
destes recursos é a tecnoloxía de radio M-MIMO (Massive MIMO), que
en virtude de atesourar as devanditas características, terá
especial utilidade en situacións de concentración masiva de
smartphones, “xa que optimiza a capacidade e velocidade de
transmisión de datos para cada usuario de maneira simultánea”.
Ademais, engade a operadora, non require do emprego de espectro
adicional, xa que optimiza o espectro existente. Por outra banda,
sería compatíbel cos terminais que están no mercado.
Vodafone
ten programado achegar estes días dende MWC unha demostración de
M-MIMO nunha rede comercial. Esta, explica a compañía, dará
capacidade e cobertura a un grupo de usuarios nunha zona específica
no exterior do recinto. Na caseta de Vodafone un mapa actualizado
exporá as súas velocidades de descarga, así como o rendemento e a
eficiencia da cela Massive MIMO.
Outra
das tecnoloxías a presentar por Vodafone será CrowdCell, un
desenvolvemento destinado a permitir máis eficiencia e
sustentabilidade no despregue de redes, ao tempo que máis
ubicuidade. Segundo está a explicar a operadora dende MWC, CrowdCell
estará dispoñíbel en dispositivos portátiles de todo tipo,
“converténdoos en emisores de rede con software de código aberto
e compoñentes de hardware de baixo custo”. Ademais, informa
Vodafone, os dispositivos con tecnoloxía CrowdCell poderán ser
controlados de xeito automático pola intelixencia de rede da
compañía de telecomunicacións, que estará asentando así o
alicerce preciso para “estender a capilaridade da rede 4G cara a
novos espazos e mellorar así a calidade de servizo, incrementando as
velocidades medias de acceso”.
Por
certo que para ultimar detalles desta tecnoloxía, a empresa de
telecomunicacións xa está a desenvolver unha iniciativa piloto con
30 clientes de seu cun router CrowdCell que amplifica a
cobertura 4G con velocidades de ata 100 Mbps en descarga. “Así”,
explica a operadora, “é posíbel fornecer servizo até a 32
usuarios de maneira simultánea”. Este piloto ten previsto
amplificarse de cara á súa aplicación a gran escala, e proseguirá
con clientes residenciais e PEME, mellorando a cobertura de
interiores.
NB-IoT
en seis cidades do ámbito estatal
Por
outra banda, e a maiores de todo o devandito, Vodafone tamén dá a
coñecer na apertura do salón do móbil de Barcelona que a primeira
rede comercial de NB-IoT (polas súas siglas en inglés Narrow-Band
Internet of Things, traducíbel por Banda Estreita da Internet
das Cousas) do mercado español xa
está dispoñíbel en seis grandes cidades: Barcelona, Bilbao,
Sevilla e Málaga, amais de Madrid e Valencia, que xa contaban con
esta tecnoloxía desde xaneiro.
Como
lembraremos, NB-IoT fornece unha serie de potencialidades importantes
no que atinxe á conectividade dos dispositivos situados en zonas de
pouca cobertura, baixo terra ou en lugares de difícil acceso.
Ademais, pódese utilizar para conectar diferentes categorías de
produtos como contadores de gas e de auga, colectores intelixentes,
alarmas de incendio, parquímetros e outro tipo de sensores.
Antes
do 31 de marzo, Vodafone España contará con máis de 1.000
estacións de rede actualizadas con tecnoloxía NB-IoT. Cada estación
base poderá conectar máis de 100.000 dispositivos á Internet das
Cousas. A idea da operadora é “situarse como pioneira na
introdución dunha tecnoloxía que creará un novo ecosistema de
aplicacións e que transformará os sectores de industria,
agricultura e servizos das Cidades Intelixentes”.
Máis
e mellor rede 4G
Por
último, Vodafone España tamén dá a coñecer coa apertura do MWC
que continúa actualizando a súa rede 4G. A idea é abranguer ao 96%
da poboación o vindeiro 31 de marzo. En concreto, 4.200 municipios
(1.200 municipios máis que hai un ano) poderán gozar da banda larga
móbil ultrarrápida da operadora. Esta mellora da cobertura
contempla todos os municipios de máis de 15.000 habitantes e o 95%
de máis de 5.000 habitantes.
Ademais,
600 novos concellos beneficiaranse dos servizos 4G coa frecuencia de
800Mhz que mellora a cobertura especialmente nos interiores dos
edificios. Desta forma, a cobertura 4G 800Mhz alcanza 2.600
municipios.
Lembrar
tamén que a día de hoxe o 4G+ de Vodafone está dispoñíbel en
1000 municipios (incluíndo as principais capitais de provincia),
con velocidades de ata 350Mbps (que chegarán a 400Mbps durante este
ano) en virtude de agregación de tres frecuencias de LTE: 800, 1800
e 2600 Mhz.