Vodafone Connecting for Good Galicia repartiu 35.000 euros en premios
mércores, 25 de abril do 2018
Onte
a Cidade da Cultura acolleu a cerimonia de peche da segunda edición
do programa Vodafone Connecting for Good Galicia, destinado a
impulsar, fortalecer e mostrar proxectos tecnolóxicos da nosa terra
con vontade solidaria e social. Amais
dos datos que achegamos dende Código Cero, centrándonos nas
declaracións dos participantes na clausura, no transcurso da mesma,
a
dita operadora de telecomunicacións e o Goberno galego deron a
coñecer que o programa concedeu 35.000 euros aos mellores proxectos
tecnolóxicos da súa convocatoria 2017. O acto foi presidido
polo conselleiro de Economía, Emprego e Industria da Xunta,
Francisco Conde López e contou coa presenza do director de
Administracións Públicas de Vodafone, Carlos Becker, e do director
xeral da Fundación Vodafone España, Santiago Moreno.
Como
lembraremos, os seis proxectos participantes da segunda edición
foron 3DAcoustic, It!, Formadox, Mediación Móbil, Sense(z) e
Tapper. Desta media ducia de iniciativas tecnolóxico-solidarias, a
Xunta (a través de GAIN) concedeu unha axuda de 25.000 euros ao
mellor proxecto da convocatoria “polo seu carácter innovador,
traballo en equipo, aproximación ao mercado e aproveitamento do
programa na súa execución e posta en marcha”. O proxecto
finalmente elixido foi It!,
empresa de fabricación 4.0 que ofrece servizos integrais de deseño,
modelado 3D, fabricación de novos produtos e enxeñaría aplicada. A
firma ten como obxectivo “achegar e popularizar o uso da tecnoloxía
de impresión 3D en todos os sectores mediante o seu mercado en liña,
o It!Market, e o seu laboratorio creativo na Coruña, o It!Lab.
Ademais,
a Fundación Vodafone España outorgou ex aequo o Premio Conectados
pola Accesibilidade, valorado en 10.000 euros, aos proxectos
3DAcoustic (que proporciona audífonos personalizados con moldes
impresos en 3D, conseguindo unha redución nos custos, tempos de
produción e unha mellor experiencia de uso grazas a un produto
propio e innovador totalmente axustado a cada persoa), e Sense(z)
(dispositivo biométrico que permite a toma de datos e parámetros,
tanto fisiolóxicos como alimentarios, mediante sensores para a
análise pormenorizada dos alimentos a inxerir).
Todos
os proxectos participantes recibiron o diploma acreditativo e un
patrocinio de 2.000 euros cada un tras completar o programa de
formación e asesoramento que se impartiu no espazo Vodafone
Connecting for Good, emprazado no Centro de Emprendemento da Cidade
da Cultura.
No
acto celebrado onte anunciouse tamén a apertura da terceira edición
da iniciativa, á que se poden presentar as candidaturas desde o 7 de
maio até o 31 de xullo. Máis información en:
http://www.fundacionvodafone.es/premios/premios-connecting-good-galicia.
Como lembraremos, Connecting for Good Galicia vén da man da Fundación Vodafone España en colaboración con Vodafone e a Axencia para a Modernización Tecnolóxica de Galicia, a Axencia Galega de Innovación (GAIN) e o Instituto Galego de Promoción Económica (IGAPE). A finalidade do programa é “apoiar a aqueles emprendedores que contribúan á innovación social a través do impulso e uso das Tecnoloxías da Información e Comunicación, as TIC, en Galicia”.