Vitae axúdanos en marzo a lograr os equipos TI máis motivados e eficientes
martes, 8 de febreiro do 2022
Vitae
Consultores, a través da súa aula virtual, vai desenvolver nesta
recta inicial de 2022 a segunda edición dunha actividade formativa
destinada a mostrarnos como coordinar e xestionar do mellor xeito
posíbel ao noso equipo de profesionais TIC, poñendo o foco nos
importantes beneficios que xera un bo ambiente de traballo:
rendibilidade, coordinación, prestixio, eficacia, eficiencia,
calidade de vida e, por suposto, resultados empresariais óptimos.
Trátase do curso Liderado
e xestión de equipos en proxectos TI áxiles, segunda edición,
unha actividade de dez horas de contidos prevista para os días 8,
11, 15 e 18 de marzo.
Segundo informa a consultora galega,
estamos ante un curso deseñado para atender as nosas necesidades
actuais, diferentes xa das que había antes da pandemia: “O
escenario mudou e precisamos afianzar e desenvolver as novas formas
de traballar e aprender”. Neste contexto, sinala Vitae, o papel do
líder, así como das relacións entre os integrantes do equipo,
resulta fundamental para que os proxectos tecnolóxicos poidan acadar
o éxito.
A
consultora recorda que as organizacións dispoñen de coñecemento
técnico, pero “no momento en que un profesional pasa a xestionar
proxectos require dunha serie de habilidades para exercer a
coordinación do equipo, a comunicación cara aos seus membros e cara
aos seus responsábeis, evitar conflitos, etc”. Para a consultora
galega, a xestión destes grupos de traballo é unha “parte
nuclear” da xestión de proxectos, por iso os mellores líderes son
os que contan “coas habilidades sociais precisas para a xestión de
equipos”.
O curso está dirixido a calquera persoa que queira
mellorar en liderado e en xestión de equipos TI (Tecnoloxías da
Información).
A encargada de impartir estes contidos será
novamente Josefina Alonso Nocelo, enxeñeira superior en Informática
e na actualidade coordinadora de Proxectos e responsábel de
Seguridade da Calidade do Desenvolvemento de Software na dirección
de Electrónica HMI do Centro Tecnolóxico de Automoción de Galicia,
o CTAG. Josefina Alonso, ademais, posúe unha ampla experiencia nos
eidos do desenvolvemento de software e do asesoramento empresarial e
a centros de I+D (traballou para a Axencia Europea do Espazo, o CTAG,
o CITIC, Tecnocom, SIVSA, Seresco, Coremain ou Balidea, entre outras
moitas entidades).