VermisLAB converte a Intelixencia Artificial en elemento transversal da súa formación extraescolar
luns, 6 de setembro do 2021
- Sergio Dacal, de VermisLAB, finalista na última edición da Maker Faire Galicia, ideou unha man robótica controlada por intelixencia artificial e sensores musculares para axudar a persoas con certas discapacidades.
O
proxecto compostelán
VermisLAB, referente na divulgación de tecnoloxías maker
(os seus integrantes son os principais impulsores do evento
argalleiro Galicia Maker Faire), prepara nestes días previos ao
inicio do curso un novo e decisivo paso en materia de formación. En
concreto, trátase da integración da Intelixencia Artificial en
todas as súas materias e para todas idades. Deste xeito, as
actividades de formación extraescolar para nenas e nenos de 4 a 16
anos contarán coa IA como un dos elementos transversais.
Durante
estas actividades extraescolares os/as alumnos/as poderán aplicar
esta tecnoloxía a proxectos relacionados coa robótica, o
recoñecemento de imaxes, a predición de fenómenos, o movemento
autónomo ou a seguridade, “entre outras moitas cousas”, explican
dende Vermis, engadindo que esta tecnoloxía consiste “nas
habilidades que teñen algunhas máquinas de aprender e razoar coma
os humanos, pero dun xeito moito máis áxil e eficiente”.
Desde
VermisLAB consideran “fundamental achegar esta tecnoloxía o antes
posíbel” ós máis pequenos e “facelo ademais dun xeito
responsábel, xa que a nosa interacción con ela vai a ser constante
e o futuro da humanidade pasa polo seu bo desenvolvemento e uso”.