Unha trintena de empresas e 75 relatores participan esta semana nas I Digital JAI
luns, 26 de outubro do 2020
Esta
semana tócanos falar de industria intelixente, que é un dos
principais recursos cos que conta o noso tecido produtivo para lograr
meirandes eficacia, eficiencia e sustentabilidade. Isto vén a conto
porque este luns comezou (desenvolvéndose até o venres) a
edición virtual das Xornadas sobre Tecnoloxías e Solucións para a
Automatización Industrial da Universidade de Vigo, as I Digital JAI,
na que van participar unha trintena de empresas e 75 relatores,
incluíndo un programa de máis de 40 horas de conferencias. Trátase
da primeira edición cen por cen dixital do evento, e da oitava
convocatoria da súa historia.
As
xornadas arrincaron este luns 26 cun acto inaugural que contou coa
presenza de representantes dos ámbitos empresarial, académico e
institucional. Todas e todos coincidiron na relevancia que ten a
dixitalización en calquera contexto histórico, e máis aínda no
actual contexto de crise sanitaria que estamos a vivir. Segundo
fixeron saber, cómpre aproveitar “as oportunidades da pandemia
para impulsar sectores produtivos máis competitivos e xeradores de
máis emprego de calidade”.
En
paralelo ás máis de 40 horas de sesións técnicas de media hora de
duración, nas que os fabricantes poderán presentar as principais
novidades nos seus desenvolvementos, en colaboración con AER
Automation e ISA Sección Española, as Digital JAI acollen, como
novidade nesta convocatoria, catro mesas redondas nas que concorrerán
destacados representantes da industria, tanto do ámbito da
tecnoloxía industrial, como usuarios finais, que se centrarán en
cuestións como a robótica, a automatización na industria da
alimentación ou a ciberseguridade.
Organizadas
polo Departamento de Enxeñaría de Sistemas e Automática; a Escola
de Enxeñaría Industrial e a Universidade de Vigo, as I Xornadas
Dixitais sobre Tecnoloxías e Solucións para a Automatización
Industrial contan entre os seus socios con Beckhoff, Bonfiglioli,
Bosch Rexroth, B&R, Delta, Endress+Hauser, Festo, HMS Networks,
HP, IFM, Kepware (Logitek), KUKA Robots Ibérica y Lapp, OnRobot,
Phoenix Contact, Pilz, Rockwell Automation, SAS, Schneider Electric,
Sick, Siemens, Universal Robots, WEG, Weidmüller, Yamaha e Yaskawa.
A
apertura das xornadas foi unha defensa do espírito innovador
No
acto inaugural das xornadas celebrado o reitor da Universidade de
Vigo, Manuel Reigosa, incidiu na disposición da UVigo para
participar na busca de novos xeitos de producir, un labor no que
xunto ás empresas tractoras e centros tecnolóxicos “debemos
aproveitar o impulso para reindustrializar a comarca e ser máis
competitivos, para axudar par que a vida dos cidadáns sexa mellor,
con máis emprego e de máis calidade”, dixo o reitor.
Pola
súa banda, o presidente do Consello Social da UVigo, Ernesto
Pedrosa, gabou, como o resto de participantes na inauguración, o
traballo desenvolvido por José Ignacio Armesto, director das JAI,
das que destacou o seu valor “para a formación avanzada de
estudantes e capacitación profesional e excelencia, así como a súa
utilidade para as empresas da contorna, que teñen un elevado grao de
automatización, así como para as e os investigadores”.
O
director del Clúster Ibérico e da planta de Zaragoza de Groupe PSA,
Juan Antonio Muñoz Codina, salientou que nesta crise sanitaria que
estamos a vivir “a capacidade de adaptación vai marcar a
diferenza. Adaptarse con axilidade e determinación ou desaparecer,
esa é a cuestión a resolver”.
Pola
súa banda, o director xeral de Denso Sistemas Térmicos e membro do
padroado de CEAGA, Roberto Cavallo, destacou a capacidade de reacción
da industria do sector da automoción nos últimos meses,”
reforzándose o papel do motor da economía galega”.
Mentres,
o director xeral do CTAG, Luis Moreno, sinalou á transición dixital
como elemento fundamental na modernización do tecido produtivo. “Ese
é o noso grande reto e tamén deberemos atraer novas actividades e
impulsar novos mercados” dixo o director do CTAG, que reivindicou o
papel dos centros tecnolóxicos para aproveitar o coñecemento
desenvolvido.
O
presidente de ASIME, Justo Sierra, referiuse á automatización como
a un dos maiores avances da historia da humanidade durante o século
XX, xunto coa análise da información a gran escala (o Big Data),
a Internet das Cousas e a Intelixencia Artificial. “Estas
ferramentas están chamadas en todas as organizacións en maior ou
menor medida a completar e modificar a automatización tradicional”,
dixo Sierra. Pola súa banda o director de AIMEN, Jesús Ángel Lago,
lembrou o traballo que desde hai anos desenvolven na automatización
e monitoraxe de procesos de fabricación en xeral.
Pola
súa banda, o director do IGAPE (Fernando Guldrís); o delegado da
Zona Franca de Vigo (David Regades) e a concelleira a Área de I+D do
Concello de Vigo (Ana Mejías), foron os encargados de achegar na
inauguración a perspectiva das administracións.