Tórculo celebrou unha xornada de portas abertas amosando os futuros do deseño gráfico
xoves, 11 de xuño do 2015
O mércores 10 de xuño a
empresa de comunicación gráfica Tórculo
abriu as portas das súas instalacións no Polígono do Tambre
(Santiago) para “amosar as posibilidades da impresión dixital no
mundo da creación artística e o deseño”. A sesión de portas
abertas contou co apoio de Creatividade
Galega, Briefing Galego
e do deseñador arxentino-catalán América
Sánchez, quen impartiu unha charla. A xornada comezou
precisamente co relatorio Novas e actuais tendencias en deseño
impartido por Sánchez, en palabras de Tórculo “gran gurú do
deseño gráfico e un dos profesionais con maior reputación neste
eido de traballo”.
O relator, entre outras
experiencias e conceptos, expuxo ante os profesionais reunidos en
Tórculo unha escolma dos seus traballos máis significativos e
referenciais, ao tempo que comentaba o proceso seguido para cada
creación, cal foi a orixe de cada unha delas, e que tipo de
referentes empregou en materia de tipografía. Segundo lembra
Tórculo, os asistentes participaron arreo na charla-coloquio,
“achegando todas as súas inquietudes e dúbidas acerca de aspectos
cos que día a día teñen que lidar os profesionais do deseño
gráfico”.
Na sesión, ademais do
devandito, a empresa compostelá presentou a súa nova tecnoloxía de
impresión dixital Canon, unha tecnoloxía a gran formato e con grande
potencial para os ámbitos do deseño e a creación gráfica.
A xeira de portas abertas
rematou cun obradoiro de traballo experimental no que os convidados
tiveron a oportunidade de experimentar cos seus propios deseños
obtendo “creacións únicas” impresas en materiais innovadores da
marca Antalis, informa Tórculo, que lembra que entre os materiais
empregados incluíronse madeira, plástico, aluminio ou niño de
abella. Ademais, a empresa anfitrioa obsequiou aos convidados cunha
colección de obras de arte presentadas en soportes orixinais e unha
lámina numerada do Apóstolo Juan do deseñador América Sánchez.