Televés comeza a implantar a súa tecnoloxía de eSaúde en fogares de Baviera
martes, 10 de marzo do 2020
- Gabriel Pollak de Cruz Vermella Baviera e Matthias Dienst de Televes Alemaña no acto de celebración do acordo
A
histórica
compañía Televés, referente mundial en equipamentos de
telecomunicación e eSaúde, vén de formalizar un acordo con
Bayerisches Rotes Kreuz (Cruz Vermella de Baviera) para pór en
marcha un proxecto piloto que permitirá desenvolver Carelife no
mercado alemán. En palabras de Televés, “trátase dun importante
para a internacionalización do produto, que se produce logo ter
validado, de maneira fidedigna, no marco do proxecto europeo
Activage, a fiabilidade e robustez desta solución de eSaúde para a
teleasistencia avanzada”. Como lembraremos, Carelife é un sistema
intelixente de Televés para o fogar baseado na monitoraxe a
distancia, avaliando de xeito autónomo a saúde e o benestar da
persoa.
Segundo
a compañía de Santiago, grazas a este acordo Carelife recibirá un
importante impulso no mercado alemán, en virtude do papel
referencial que xoga a Cruz Vermella de Baviera, provedor referente
de servizos sociosanitarios, na súa contorna máis próxima.
Para
o desenvolvemento do piloto equiparanse 20 fogares con sensores que
permiten facer seguimento da actividade diaria das persoas,
analizando os seus hábitos e rutinas para establecer parámetros que
permitan, en palabras de Televés, “definir potenciais situacións
de risco que activan de forma automática os recursos asistenciais,
complementando así o tradicional botón de emerxencia”.
Respecto
das posibilidades que se abren con este acordo en relación coa
presenza da firma galega no mercado xermano, Matthias Dienst,
director xerente de Televes Alemaña, explicábao deste xeito:
“Estamos moi satisfeitos de iniciar esta colaboración con
Bayerisches Rotes Kreuz. Por recursos, experiencia e a súa
contrastada vocación de servizo, non poderiamos contar con mellor
compañeiro de viaxe para desenvolver Carelife nun mercado tan
esixente e, ao mesmo tempo, tan cheo de oportunidades como é o de
Alemaña”.